Dosa Batter Mystery: अहमदाबादमध्ये डोशाचे पीठ खाल्ल्याने दोन बहिणींचा मृत्यू झाल्याचा संशय होता. मात्र, केवळ आईचे दूध पिणाऱ्या ३ महिन्यांच्या बाळाचाही मृत्यू झाल्याने आणि डॉक्टरांच्या मते दुधावाटे विषबाधा होत नसल्याने, या प्रकरणाला आता घातपाताचे वळण लागले आहे.
अहमदाबाद: गुजरातच्या अहमदाबादमध्ये एकाच कुटुंबातील दोन चिमुरड्या बहिणींच्या मृत्यूने संपूर्ण राज्य हादरले आहे. डोशाचे पीठ खाल्ल्याने विषबाधा झाल्याचा प्राथमिक संशय व्यक्त केला जात असला तरी, डॉक्टरांच्या एका दाव्यामुळे आणि पोलिसांच्या संशयामुळे या प्रकरणाला आता एक वेगळे वळण मिळाले आहे. ३ महिन्यांची राहा आणि ४ वर्षांची मिश्री अशा दोन निष्पाप जीवांच्या मृत्यूने अनेक प्रश्न उपस्थित केले आहेत.
नेमकं प्रकरण काय?
चांदखेडा भागातील विमल प्रजापती यांनी स्थानिक डेअरीतून डोशाचे पीठ विकत आणले होते. हे पीठ खाल्ल्यानंतर कुटुंबातील चौघांची प्रकृती खालावली. दुर्दैवाने, ४ एप्रिलला ३ महिन्यांच्या राहाचा आणि ५ एप्रिलला ४ वर्षांच्या मिश्रीचा मृत्यू झाला. मात्र, या मृत्यूचे कारण केवळ 'अन्नबाधा' आहे की 'विषप्रयोग', याचा तपास पोलीस करत आहेत.
डॉक्टरांच्या विधानाने वाढलं रहस्य
या प्रकरणात सर्वात मोठा पेच ३ महिन्यांच्या राहाच्या मृत्यूवरून निर्माण झाला आहे.
Related Articles
डॉक्टरांचे मत: तज्ज्ञांच्या मते, जर आईला विषबाधा झाली असेल आणि ती बाळाला स्तनपान करत असेल, तरीही विषाचा अंश दुधावाटे बाळापर्यंत पोहोचत नाही.
मोठा प्रश्न: राहा केवळ आईचे दूध पीत होती, तिने डोसा किंवा कोणतेही घट्ट पदार्थ खाल्ले नव्हते. मग आईच्या दुधावाटे विषबाधा पसरत नसेल, तर राहाचा मृत्यू कसा झाला? या एका प्रश्नाने पोलीस आणि वैद्यकीय पथकाची झोप उडवली आहे.
पोलिसांचा तपास आता 'सीसीटीव्ही'वर
डेअरी मालकाने दावा केला आहे की, त्याच बॅचमधील पीठ इतर अनेक ग्राहकांनी नेले होते, पण कोणालाही त्रास झाला नाही. त्यामुळे पोलिसांनी आता तपासाची चक्रं फिरवली आहेत.
१. सीसीटीव्ही फुटेज: विमल प्रजापती यांनी डेअरीतून पीठ विकत घेतल्यावर ते थेट घरी गेले की वाटेत कुठे थांबले होते?
२. छेडछाडीचा संशय: पीठ खरेदी केल्यानंतर आणि घरी नेईपर्यंत त्यात काही मिसळले गेले होते का? याची पडताळणी पोलीस करत आहेत.
पुढील पाऊल: मृतदेह बाहेर काढून शवविच्छेदन
प्रकरणाचे गांभीर्य लक्षात घेऊन पोलिसांनी ३ महिन्यांच्या राहाचा मृतदेह थडग्यातून बाहेर काढला असून 'पॅनल पोस्टमॉर्टम'साठी पाठवला आहे. फॉरेन्सिक टीमने घरातील कपडे, पिठाचे भांडे आणि औषधांचे नमुने जप्त केले आहेत. या सर्व चाचण्यांचा अहवाल येण्यास किमान १५ दिवस लागण्याची शक्यता आहे.
आईचे दूध सुरक्षित असेल, तर राहाचा मृत्यू कशामुळे झाला? हा घातपात आहे की दुर्दैवी योगायोग? या प्रश्नांची उत्तरे आता केवळ फॉरेन्सिक रिपोर्टच देऊ शकणार आहे.
