दिल्ली विद्यापीठ विद्यार्थी संघटनेच्या (DUSU) निवडणुकीत ABVP ने अध्यक्षपदासह तीन महत्त्वाच्या जागा जिंकल्या आहेत. तर उपाध्यक्षपदी अपक्ष उमेदवाराने बाजी मारली. हायकोर्टाच्या आदेशानुसार कॅम्पसमध्ये विजयोत्सवावर बंदी घालण्यात आली आहे.
दिल्ली विद्यापीठ विद्यार्थी संघटनेच्या (DUSU) निवडणुकीत अखिल भारतीय विद्यार्थी परिषदेने (ABVP) मोठा विजय मिळवला आहे. महत्त्वाच्या चारपैकी तीन जागांवर ABVP ने झेंडा फडकवला. अध्यक्ष, सचिव आणि सहसचिव या पदांवर ABVP चे उमेदवार विजयी झाले आहेत. तर उपाध्यक्षपदी एका अपक्ष उमेदवाराने बाजी मारली. या निवडणुकीत NSUI आणि डाव्या आघाडीला चारही जागांवर पराभवाचा सामना करावा लागला. अध्यक्षपदासाठी ABVP चे यश डबास आणि NSUI चे विजय शंकर मीणा यांच्यात अटीतटीची लढत पाहायला मिळाली. दुसरीकडे, NSUI सोडून अपक्ष म्हणून निवडणूक लढवणाऱ्या दीपांशू शौकीन यांनी उपाध्यक्षपदी दणदणीत विजय मिळवला. दरम्यान, विद्यापीठ प्रशासनाने ABVP ला मदत केल्याचा आरोप NSUI ने केला आहे.
मतमोजणीच्या २० फेऱ्यांनंतर निकाल जाहीर करण्यात आला. ABVP च्या यश डबास यांनी २४,५७६ मते मिळवून अध्यक्षपदावर मोहोर उमटवली. तर NSUI च्या विजय शंकर मीणा यांना २२,५२३ मते मिळाली आणि ते दुसऱ्या स्थानावर राहिले. सचिवपदी २१,६५० मतांसह रिया छावडी विजयी झाल्या. तसेच, १६,६१५ मते मिळवून लक्ष्य राज सिंह यांनी सहसचिव पदावर विजय मिळवला. NSUI मधून बाहेर पडून अपक्ष लढणाऱ्या दीपांशू शौकीन यांनी तब्बल ३०,६१५ मते मिळवत उपाध्यक्षपद खिशात घातले. या जागेवर ABVP चे इशू मौर्य १६,९१० मतांसह दुसऱ्या क्रमांकावर राहिले.
अध्यक्ष, उपाध्यक्ष, सचिव आणि सहसचिव या चार प्रमुख पदांसाठी एकूण २० उमेदवार रिंगणात होते. हिंसक घटना घडण्याची शक्यता असल्याने काल कडेकोट बंदोबस्तात दिल्ली विद्यापीठाची निवडणूक पार पडली. तसेच, दिल्ली हायकोर्टाने कोणत्याही प्रकारच्या विजयोत्सवावर बंदी घातली आहे.
हायकोर्टाच्या आदेशाचे पालन करत, विद्यापीठ परिसर किंवा बाहेर कोणत्याही प्रकारच्या रॅली आणि विजयोत्सव साजरा करू नये, असे आवाहन प्रशासनाने केले आहे. तरीही विद्यार्थी विद्यापीठाबाहेर मोठ्या संख्येने जमा झाले आहेत. या बंदीचे उल्लंघन करून कोणीही रॅली काढल्यास त्यांच्यावर फौजदारी गुन्हा दाखल करण्याचे आदेश देण्यात आले आहेत. तसेच, न्यायालयीन अवमानाचा खटलाही चालवला जाईल, असा इशारा देण्यात आला आहे.
