७०० फूट खोल बोअरवेलमध्ये ३ वर्षांची चिमुकली अडकली

जयपूर . बोअरवेलच्या भयंकर दुर्घटना वारंवार घडत असतानाही प्रशासनाचे डोळे उघडत नाहीत. या चुकांचे बळी ठरत आहेत ती लहान मुले. आता तर तब्बल ७०० फूट खोल बोअरवेलमध्ये ३ वर्षांची चिमुकली पडली आहे. बचाव पथके कामाला लागली आहेत. बोअरवेलची खोली जास्त असल्याने बचावकार्य आव्हानात्मक ठरत आहे. तब्बल १५० फूट खोलीवरून चिमुकली मदतीसाठी हात वर करत असल्याचे दृश्य हृदयद्रावक आहे. ही घटना राजस्थानमधील किरातपूरच्या बडियाली धानियात घडली आहे.

तीन वर्षांच्या चिमुकलीचे नाव चेतना आहे. वडिलांसोबत खेळत असताना ती ७०० फूट खोल बोअरवेलमध्ये पडली. पाण्याविना असलेला बोअरवेल झाकलेला नव्हता. त्याच्या आजूबाजूला झाडे, गवत वाढल्याने बोअरवेल दिसत नव्हता. त्यामुळे ३ वर्षांची चेतना बोअरवेलमध्ये पडली. सुमारे १५० फूट खोलीवर ती अडकली आहे.

चिमुकली बोअरवेलमध्ये पडताच वडिलांनी आरडाओरड केली. मदतीसाठी ओरड केली. लगेचच स्थानिक लोक धावून आले. पोलिसांना माहिती दिली. माहिती मिळताच जिल्हा प्रशासन घटनास्थळी दाखल झाले. पोलिस आणि बचाव पथके घटनास्थळी धावून आली आणि बचावकार्य सुरू केले. बोअरवेलमध्ये अडकलेल्या चिमुकलीला ऑक्सिजन पुरवठा केला जात आहे. दुसऱ्या बाजूने जेसीबी आणि इतर यंत्रांच्या साहाय्याने बचावकार्य सुरू आहे. गेल्या १५ तासांहून अधिक काळ बचावकार्य सुरू आहे.

बचावकार्याच्या सुरुवातीलाच ऑक्सिजनसोबत कॅमेराही खाली सोडण्यात आला. या कॅमेऱ्यात चिमुकली मदतीसाठी हात वर करत असल्याचे दिसून आले. हुक तंत्रज्ञानाच्या साहाय्याने चिमुकलीला बाहेर काढण्याचे प्रयत्न सुरू आहेत. मात्र, बचावकार्य बराच वेळ चालत असल्याने चिमुकलीची प्रकृती खालावली आहे. एनडीआरएफ आणि एसडीआरएफची पथके बचावकार्यात गुंतली आहेत. मात्र, अद्याप चिमुकलीला बाहेर काढता आलेले नाही.

हुक तंत्रज्ञानाच्या साहाय्याने चिमुकलीला बाहेर काढण्यासाठी एनडीआरएफ आणि एसडीआरएफच्या पथकांनी पालकांची परवानगी घेतली आहे. कारण या तंत्रज्ञानामुळे चिमुकलीला दुखापत होण्याची शक्यता आहे. यामुळे तिच्या जीविताला धोका निर्माण होऊ शकतो. हुक तंत्रज्ञान यशस्वी झाल्यास चिमुकलीला बाहेर काढता येईल. मात्र, थोडीशीही चूक झाल्यास तिच्या जीविताला धोका निर्माण होईल.

हुक तंत्रज्ञानासाठी परवानगी मिळाल्याने आता या तंत्रज्ञानाच्या साहाय्याने चिमुकलीला बाहेर काढण्याचे प्रयत्न सुरू आहेत. बोअरवेलमध्ये लोखंडी रॉड सोडून त्यावरील हुकच्या साहाय्याने चिमुकलीला वर खेचण्याचा हा प्रयत्न आहे. जेसीबीच्या साहाय्याने चिमुकली ज्या खोलीवर आहे तिथे पोहोचण्यासाठी किमान ५ दिवस लागतील, असे सांगण्यात येत आहे. त्यामुळे चिमुकलीला लवकरात लवकर बाहेर काढण्यासाठी हुक तंत्रज्ञानाचा वापर केला जात आहे. पालक आपल्या मुलीला सुखरूप बाहेर पडावे, अशी प्रार्थना करत आहेत. कुटुंबीय आणि स्थानिक लोकांमध्ये चिंता वाढत आहे.