108 Maoists Surrender in Bastar : छत्तीसगडच्या बस्तरमध्ये ४४ महिलांसह १०८ माओवाद्यांनी आत्मसमर्पण केलं आहे. त्यांच्याकडून १०१ शस्त्रं, ३.६१ कोटींची रोकड आणि तब्बल सव्वा किलो सोनं जप्त करण्यात आलं. नक्षलविरोधी अभियानातील ही आतापर्यंतची सर्वात मोठी कारवाई मानली जात आहे.
108 Maoists Surrender in Bastar : छत्तीसगडच्या बस्तरमधून एक मोठी बातमी समोर आली आहे. इथे तब्बल १०८ माओवाद्यांनी आत्मसमर्पण केलं आहे. बुधवारी झालेल्या या मोठ्या कारवाईत ४४ महिला माओवाद्यांचाही समावेश आहे. विशेष म्हणजे, या माओवाद्यांनी फक्त शस्त्रंच नाही, तर कोट्यवधींची रोकड आणि सोनंही पोलिसांच्या स्वाधीन केलं आहे.
या गटाकडून १०१ शस्त्रं जप्त करण्यात आली आहेत, ज्यात एके-४७, इन्सास रायफल, कार्बाइन आणि बीजीएल सारख्या आधुनिक रायफल्सचा समावेश आहे. यासोबतच ३.६१ कोटी रुपये रोख आणि १.६४ कोटी रुपये किमतीचं सोनंही जप्त करण्यात आलं आहे. हे सोनं जवळपास सव्वा किलो (१२५ तोळे) आहे. नक्षलविरोधी अभियानाच्या इतिहासात पहिल्यांदाच एवढ्या मोठ्या प्रमाणात रोकड आणि सोनं जप्त करण्यात आलं आहे.
आत्मसमर्पण केलेल्यांमध्ये ६ डिव्हिजनल कमिटी मेंबर (DVCM), ३ कंपनी प्लाटून सदस्य, १८ पीपीसीएम सदस्य, २३ एरिया कमिटी सदस्य आणि ५६ सामान्य पार्टी सदस्यांचा समावेश असल्याची माहिती अधिकाऱ्यांनी दिली. यातील सहा जणांवर तर प्रत्येकी ८ लाख रुपयांचं बक्षीस जाहीर करण्यात आलं होतं.
Related Articles
"छत्तीसगडला नक्षलवादातून मुक्त करण्याच्या दिशेने हे एक मोठं यश आहे," असं राज्याचे उपमुख्यमंत्री विजय शर्मा यांनी म्हटलं आहे. सरकारच्या 'पूना मरदम' या योजनेअंतर्गत हे आत्मसमर्पण झालं आहे. 'पूना मरदम' या स्थानिक भाषेतील शब्दाचा अर्थ 'पुनर्जन्मातून पुनर्वसन' असा होतो.
दंडकारण्य स्पेशल झोनल कमिटीचे (DKSZC) हे १०८ माओवादी जगदलपूरमधील बस्तर डिव्हिजन मुख्यालयात शरण आले. हे सर्वजण बिजापूर, नारायणपूर, बस्तर, कांकेर, सुकमा आणि दंतेवाडा या जिल्ह्यांमधील आहेत. सरकारने या १०८ माओवाद्यांसाठी एकूण ३.९५ कोटी रुपयांचं बक्षीस जाहीर केलं आहे. आत्मसमर्पण करताना प्रत्येकाला ५०,००० रुपये तात्काळ दिले जातील आणि पुनर्वसनाची उर्वरित रक्कम तीन वर्षांनंतर त्यांच्या बँक खात्यात जमा केली जाईल, असंही सरकारने स्पष्ट केलं आहे.
