सरकारने आरोग्य चांगले असल्याचा अहवाल दिला असला तरी सर्वोच्च न्यायालयाने त्याला सोडण्याचे आदेश दिले.
कोलकाता: ३६ वर्षांच्या तुरुंगवासा नंतर १०४ वर्षीय कैदी तुरुंगातून सुटला. रसिकत चंद्र मोंडोल हा बंगालचा रहिवासी तुरुंगातून सुटला आहे. आता कुटुंबासोबत वेळ घालवायचा आणि बागकाम करायचा आहे, असे रसिकत म्हणाले.
माल्डा जिल्ह्यातील पश्चिम नारायणपूर गावातील रसिकतवर मालमत्तेच्या वादातून आपल्या भावाची हत्या केल्याचा आरोप होता. १९८८ मध्ये, वयाच्या ६८ व्या वर्षी त्याला अटक करण्यात आली. १९९२ मध्ये माल्डा जिल्हा सत्र न्यायालयाने त्याला जन्मठेपेची शिक्षा सुनावली.
२०१८ मध्ये, त्यांनी कलकत्ता उच्च न्यायालयात शिक्षेविरुद्ध अपील केले, परंतु ते फेटाळण्यात आले. त्यानंतर त्यांनी सर्वोच्च न्यायालयात धाव घेतली. तिथेही त्यांना असाच निकाल मिळाला. २०२० मध्ये, वयाच्या ९९ व्या वर्षी, त्यांनी वय आणि आरोग्याच्या कारणास्तव पुन्हा एकदा सर्वोच्च न्यायालयात सुटकेसाठी अपील केले. न्यायालयाने पश्चिम बंगाल सरकारला त्यांच्या आरोग्याचा अहवाल सादर करण्यास सांगितले. सरकारने आरोग्य चांगले असल्याचा अहवाल दिला असला तरी सर्वोच्च न्यायालयाने त्याला सोडण्याचे आदेश दिले.
बाहेर पडल्यानंतर रसिकतने आपले वय १०८ वर्षे असल्याचे सांगितले. पण त्यांच्या मुलाने ते १०४ वर्षे असल्याचे सांगितले. तुरुंगातील नोंदींमध्येही १०४ वर्षे नमूद आहे. किती वर्षे तुरुंगात घालवली हे त्यांना आठवत नाही, असेही ते म्हणाले. तुरुंगात चांगले वर्तन केल्यामुळे वडिलांची सुटका झाली, असे त्यांच्या मुलाने सांगितले. वडिलांच्या सुटकेसाठी कारणीभूत ठरलेल्या सर्वोच्च न्यायालयाच्या निर्णयावर आम्ही खूप खूश आहोत, असेही मुलाने सांगितले.
