संदाली सिन्हा २००१ मध्ये 'तुम बिन' या सिनेमातून एका रात्रीत स्टार झाली. पण लग्नानंतर तिने फिल्म इंडस्ट्रीला रामराम ठोकला. आता ती दोन मुलांची आई असून, पती किरण साळसकर यांच्यासोबत मुंबईत 'कंट्री ऑफ ओरिजिन' नावाचा एक मोठा डेझर्ट ब्रँड चालवते.
२००१ साली आलेल्या 'तुम बिन' या रोमँटिक सिनेमातून संदाली सिन्हा बॉलिवूडमध्ये आली आणि प्रेक्षकांच्या मनात घर करून गेली. तिची निरागसता आणि सिनेमाची गाणी इतकी गाजली की, ती तरुणांमध्ये प्रचंड लोकप्रिय झाली. पण इतकी प्रसिद्धी मिळूनही संदालीचा बॉलिवूडमधील प्रवास फार काळ टिकला नाही.
कोण आहे संदाली सिन्हा?
मिळालेल्या माहितीनुसार, संदालीचं बालपण बिहारमध्ये गेलं. वडिलांच्या निधनानंतर ती आई आणि बहिणीसोबत दिल्लीला शिफ्ट झाली. दिल्लीत असतानाच तिला अभिनयाची आवड निर्माण झाली आणि त्यानंतर तिने मुंबई गाठली. सुरुवातीला तिने मॉडेलिंग, जाहिराती आणि शॉर्ट फिल्म्समध्ये काम केलं. १९९७ मध्ये 'तन्हा' या मालिकेतून तिने टीव्हीवर पदार्पण केलं. सोनू निगमच्या 'दिवाना' अल्बममधील 'कौन है वो लडकी' या गाण्यामुळे ती पहिल्यांदा लोकांच्या नजरेत आली.
पण तिला खरी ओळख मिळाली ती २००१ च्या 'तुम बिन' सिनेमामुळे. हा सिनेमा प्रेक्षकांना खूप आवडला आणि 'तुम बिन जिया जाए कैसे' सारख्या गाण्यांनी तर संदालीला घराघरात पोहोचवलं. त्या काळात ती बॉलिवूडमधील एक ओळखीचा चेहरा बनली होती. मात्र, त्यानंतर तिचं हिंदी सिनेसृष्टीतील करिअर फारसं चाललं नाही. तिने 'ओम', 'पिंजर' आणि 'अब तुम्हारे हवाले वतन साथियों' यांसारख्या सिनेमांमध्ये काम केलं. २००५ मध्ये 'ओरेय पांडू' या सिनेमातून तिने तेलुगूमध्येही पदार्पण केलं.
संदालीने सिनेमे का सोडले?
काही काळानंतर संदालीने अभिनयातून ब्रेक घेतला आणि आपल्या वैयक्तिक आयुष्यावर लक्ष केंद्रित करण्याचा निर्णय घेतला. नोव्हेंबर २००५ मध्ये तिने किरण साळसकर यांच्याशी लग्न केलं. २०२१ मध्ये 'एचटी सिटी'ला दिलेल्या एका मुलाखतीत संदाली म्हणाली होती की, "सिनेमे सोडण्याचा माझा काही खास प्लॅन नव्हता, गोष्टी आपोआप घडत गेल्या." लग्नानंतर ती दोन मुलांची आई झाली आणि अभिनयापासून पूर्णपणे दूर गेली.
संदाली सिन्हा आता कुठे आहे?
संदालीने बॉलिवूड सोडलं असलं तरी, तिने स्वतःला कामात व्यस्त ठेवलं आहे. तिने पती किरण साळसकर यांच्यासोबत मिळून उद्योजिका म्हणून एक नवी सुरुवात केली. या दोघांनी मिळून मुंबईत 'कंट्री ऑफ ओरिजिन' (COO) नावाचा एक आर्टिसनल बेकरी आणि पॅटिसरी ब्रँड सुरू केला. आज या ब्रँडचे मुंबईतील अनेक उच्चभ्रू भागांमध्ये आउटलेट्स आहेत.
किरण साळसकर हे हॉस्पिटॅलिटी आणि फूड अँड बेव्हरेज क्षेत्रातील एक मोठं नाव आहे. काही रिपोर्ट्सनुसार, त्यांची एकूण संपत्ती सुमारे १५० कोटी रुपये असल्याचा अंदाज आहे, पण या आकड्याला अधिकृत दुजोरा मिळालेला नाही. आज संदालीचं आयुष्य बॉलिवूडच्या झगमगाटापासून दूर, तिचं कुटुंब आणि व्यवसायाभोवती फिरत आहे. 'तुम बिन'मधून मिळालेल्या लोकप्रियतेनंतर तिने निवडलेला हा मार्ग तिच्या सुरुवातीच्या करिअरच्या अगदी वेगळा आहे.
