ऑफिसमध्ये कॉफी मशीन फक्त २० सेकंदांच्या अंतरावर आहे. पण बॉसने कामाच्या वेळेत कॉफी पिण्यावर बंदी घातली आहे. घरून थर्मासमध्ये कॉफी आणायलाही मनाई आहे. कॉफी प्यायल्याने कामावर परिणाम होतो, असा या बॉसचा अजब दावा आहे.
ऑफिसमधले विचित्र नियम आणि बॉसचा जाचकपणा यामुळे अनेकदा कर्मचारी मानसिकदृष्ट्या थकून जातात. असाच एक भयंकर अनुभव एका कर्मचाऱ्याने सोशल मीडियावर शेअर केला आहे. या कर्मचाऱ्याच्या बॉसने ऑफिसमध्ये कामाच्या वेळेत कॉफी पिण्यावर चक्क बंदी घातली आहे.
ऑफिसमधलं कॉफी मशीन त्याच्या जागेवरून फक्त २० सेकंदांच्या अंतरावर आहे. तरीही त्याला तिथे जाण्याची परवानगी नाही. एवढंच नाही, तर घरून थर्मास किंवा कॅनमध्ये कॉफी आणायलाही सक्त मनाई आहे. 'कॉफी प्यायल्याने कामावर वाईट परिणाम होतो', असा या बॉसचा अजब दावा आहे. यावर बॉसने एक भन्नाट उपायही सुचवला आहे. 'कॉफी पिण्याऐवजी तुमची शिफ्ट एक तास उशिरा सुरू करा', असा अजब सल्ला त्याने दिला आहे.
हा कर्मचारी ज्या क्षेत्रात काम करतो, ते खूप दुर्मिळ आहे. स्वतःचं करिअर घडवण्यासाठी आणि नवीन गोष्टी शिकण्यासाठी त्याला ही नोकरी टिकवणं गरजेचं आहे. पहिल्या महिन्याचा करार संपेपर्यंत या विचित्र नियमांशी जुळवून घेण्याचा त्याचा विचार आहे. पण अशा लहरी आणि अविश्वासू बॉसच्या हाताखाली काम करणं खूप कठीण असल्याचं त्याने म्हटलं आहे.
या बॉसचे प्रताप इथेच थांबत नाहीत. तो ऑफिसच्या घड्याळाची वेळ मुद्दाम तीन मिनिटे पुढे करून ठेवतो. कर्मचाऱ्यांनी ती वेळ दुरुस्त केली, की बॉस पुन्हा घड्याळ पुढे करतो, असंही या पोस्टमध्ये म्हटलं आहे. बॉसच्या या वागण्याला जाब विचारण्याची इतर सहकाऱ्यांची हिंमत होत नाही.
या पोस्टवर अनेक युजर्सनी बॉसच्या वागण्यावर सडकून टीका केली आहे. 'लोक वाईट नोकरी नाही, तर वाईट बॉस सोडून जातात', अशी कमेंट एकाने केली आहे. अनेकांनी त्याला लवकरात लवकर नवीन नोकरी शोधण्याचा सल्ला दिला आहे. 'जगातली निम्मी कामं कॉफीच्या एनर्जीवर चालतात. कॉफीवर बंदी घालणाऱ्या बॉसला अजिबात सहन करू नका', असं मत दुसऱ्या एका युजरने मांडलं आहे.
