अभिनेत्री मलायका अरोरा उद्योगपती हर्ष मेहतासोबतच्या नात्याच्या चर्चांमुळे ट्रोल होत आहे. वयातील अंतरावरून होणाऱ्या टीकेवर तिने आता प्रतिक्रिया दिली असून, सोशल मीडियावरील प्रत्येक गोष्ट गंभीरपणे घेण्याची गरज नसल्याचं म्हटलं आहे. तिने आपल्या मानसिक शांततेला अधिक महत्त्व देत असल्याचं स्पष्ट केलं आहे.
अभिनेत्री मलाईका अरोरा पुन्हा एकदा तिच्या खासगी आयुष्यामुळे चर्चेत आली आहे. उद्योगपती हर्ष मेहतासोबतच्या रिलेशनशिपच्या चर्चांमुळे सोशल मीडियावर तिच्यावर मोठ्या प्रमाणात टीका होत आहे. विशेषतः दोघांच्या वयातील अंतरावरून नेटकऱ्यांनी तिला लक्ष्य केलं. मात्र आता मलायकाने या ट्रोलिंगवर स्पष्ट प्रतिक्रिया दिली आहे.
मलायका काय म्हणाली?
एका मुलाखतीत बोलताना मलायकाने सांगितलं की, इंटरनेटवरील प्रत्येक गोष्ट गंभीरपणे घेण्याची गरज नसते. “सोशल मीडियावर खूप आवाज असतो, पण तो नेहमी शहाणपणाचा असेलच असं नाही,” असं म्हणत तिने ट्रोलर्सकडे दुर्लक्ष करण्याची सवय लागल्याचं सांगितलं. अनेक वर्षांच्या अनुभवातून स्वतःभोवती एक मानसिक सीमारेषा तयार केली असल्याचंही ती म्हणाली.
गेल्या काही दिवसांत मलायका आणि हर्ष मेहता अनेकदा एकत्र दिसले आहेत. नुकतेच हे दोघे मलायकाचा मुलगा अरहान खानसोबतही स्पॉट झाले होते. या फॅमिली आउटिंगनंतर त्यांच्या नात्याच्या चर्चांना आणखी उधाण आलं. मात्र या सगळ्या चर्चांदरम्यान हर्ष मेहता कॅमेऱ्यांपासून दूर राहण्याचा प्रयत्न करताना दिसला होता.
Related Articles
हर्ष कोण आहे?
हर्ष मेहता हा मुंबईतील डायमंड व्यापारी असल्याचं सांगितलं जात आहे. सोशल मीडियावर दोघांच्या रिलेशनशिपबद्दल अनेक चर्चा सुरू असल्या तरी मलायका किंवा हर्ष यांनी अद्याप त्यांच्या नात्याबाबत अधिकृत घोषणा केलेली नाही. मात्र दोघांचे एकत्र फोटो आणि व्हिडीओ सतत व्हायरल होत असल्याने चाहत्यांमध्ये उत्सुकता वाढली आहे. मलायकाच्या डेटिंग लाइफवर याआधीही अनेकदा चर्चा झाली आहे. अभिनेता अर्जुन कपूर सोबतच्या नात्यावेळीही वयाच्या अंतरावरून तिला ट्रोल करण्यात आलं होतं. त्यानंतर आता पुन्हा एकदा कमी वयाच्या व्यक्तीसोबत नाव जोडल्यानंतर सोशल मीडियावर विविध प्रतिक्रिया उमटताना दिसत आहेत.
दरम्यान, मलायकाने स्पष्ट केलं की आता ती स्वतःच्या आयुष्याला आणि मानसिक शांततेला अधिक महत्त्व देते. “प्रत्येक मताला उत्तर देणं गरजेचं नसतं. माझं कुटुंब, काम आणि माझा आनंद यावर मी लक्ष केंद्रित करते,” असं ती म्हणाली. तिच्या या वक्तव्यानंतर अनेक चाहत्यांनी सोशल मीडियावर तिच्या भूमिकेचं समर्थन केलं आहे.
