बिग बॉस तेलुगू १० च्या घरात सध्या वातावरण चांगलंच तापलंय. कोण कधी मित्र बनेल आणि कधी शत्रू, हे सांगता येत नाही. नुकत्याच झालेल्या टास्कमध्ये सुधीरचा मुकेश आणि अमनसोबत मोठा राडा झाला.
सुधीर आणि मुकेशमध्ये जुंपली
बिग बॉस तेलुगू सीझन १० आता चांगलाच रंगात आलाय. सध्या घरात नवव्या आठवड्याचा खेळ सुरू असून तो खूपच रंजक वळणावर पोहोचलाय. या आठवड्यात 'रिवॉर्ड अँड रिव्हेंज' (Rewards and Revenge) थीमवर टास्क सुरू आहेत, त्यामुळे स्पर्धकांचं टेन्शन चांगलंच वाढलंय. पुढच्या म्हणजेच दहाव्या आठवड्यात 'फॅमिली वीक' असणार आहे. त्यामुळे घरच्यांना भेटण्याची संधी मिळवण्यासाठी सगळेच जीव तोडून खेळत आहेत. पण या टास्कच्या नादात घरातील जुनी नाती तुटताना आणि नवे वाद चव्हाट्यावर येताना दिसत आहेत.
संचालकांचा गोंधळ
या आठवड्यात झालेल्या चॅलेंजेसमध्ये स्पर्धकांमध्ये जोरदार टक्कर पाहायला मिळाली. पहिल्या चॅलेंजमध्ये मुकेशच्या टीमने बाजी मारली आणि त्यांच्या टीममधील श्वेताला रिवॉर्ड मिळालं. पण या टास्कमध्ये संचालक असलेले त्रिगुण आणि मुकेश यांच्यात एकमत होऊ शकलं नाही. दोघांनी वेगवेगळे निर्णय दिल्याने शेवटी स्वतः बिग बॉसला मध्यस्थी करून त्यांना ताकीद द्यावी लागली. त्यानंतर दुसऱ्या चॅलेंजमध्ये पोती आणि थर्माकोलचा वापर करून '८' आकाराचा एक नवा राऊंड टास्क खेळवण्यात आला. यात स्पर्धकांनी एकमेकांना ढकलत आपापल्या बॅगा वाचवण्याचा आटोकाट प्रयत्न केला.
सुधीर आणि मुकेशचा पारा चढला
याच टास्कदरम्यान घरात एक अनपेक्षित घटना घडली. गेल्या काही दिवसांपासून सुधीर हा मुकेश आणि वर्षिणीच्या ग्रुपपासून थोडा दूरच राहतोय. नॉमिनेशनच्या वेळी मुकेशने बोललेले शब्द आणि वर्षिणीच्या वागण्यामुळे सुधीर चांगलाच वैतागला होता. नुकत्याच झालेल्या टास्कमध्ये मुकेशची बॅग रिकामी होत असल्याचं पाहून, "तशीही मुकेशच्या बॅगमध्ये कमीच आहे, तो एलिमिनेट होईलच ना," असा वाद सुधीरने अमनसोबत घातला. हे ऐकून मुकेशला राग आला आणि त्याने सुधीरची बॅग ओढण्याचा प्रयत्न केला. यावर सुधीरचा संयम सुटला आणि तो चांगलाच भडकला. "उगाच मदत करायची आणि नंतर तुझ्यामुळेच मी इथे आहे असं म्हणायचं? तू दिलेल्या अधिकारावर मी इथे राहायचं का?" असं म्हणत रागाच्या भरात त्याने आपला माईक आणि बॅग खाली फेकून दिली.
मला बाहेर काढा..
तो तिथेच थांबला नाही, तर "मला ती मदत अजिबात नकोय.. लोकांना माझा खेळ आवडत नसेल तर थेट मला एलिमिनेट करून टाका," अशी थेट विनंती त्याने प्रेक्षकांना केली. या प्रकारामुळे घरात एकच खळबळ उडाली. त्यानंतर अमन आणि सुधीरमध्येही मोठा वाद झाला. अमनमुळे सुधीर या खेळातून बाद (डिसक्वालिफाय) झाला. त्यामुळे सुधीरने अमनवर अनेक कमेंट्स केल्या. यावर अमननेही सडेतोड उत्तर देत सुधीर आता आपल्या टार्गेटवर असल्याचं सांगितलं. या टास्कमध्ये वामशीने विजय मिळवला. दरम्यान, या आठवड्यात कॅप्टन त्रिगुण, आरके आणि श्वेता वगळता घरातील बाकी सर्व सदस्य नॉमिनेट झाले आहेत. सध्याची परिस्थिती पाहता, मुकेशच्या ग्रुपमधून यावेळी सुधीर आणि वर्षिणी डेंजर झोनमध्ये असल्याचं स्पष्ट दिसत आहे.
