मुंबईत डिझायनर मनीष मल्होत्राच्या १५ व्या मिजवान फंडरेझर फॅशन शोमध्ये आलिया भट्ट आणि विकी कौशल शोस्टॉपर ठरले. 'लव्ह अँड वॉर'च्या या जोडीने ग्रामीण कलाकारांच्या सन्मानार्थ रॅम्पवर खास पारंपरिक लूकमध्ये एन्ट्री घेतली.
मुंबई : मुंबईत शनिवारी डिझायनर मनीष मल्होत्राच्या १५ व्या मिजवान फंडरेझर फॅशन शोचे आयोजन करण्यात आले होते. या शोमध्ये आलिया भट्ट आणि विकी कौशल हे स्टार शोस्टॉपर ठरले.
संजय लीला भन्साळी यांच्या आगामी 'लव्ह अँड वॉर' चित्रपटात आलिया आणि विकी लवकरच रणबीर कपूरसोबत दिसणार आहेत. या फॅशन शोमध्ये दोघांची भन्नाट केमिस्ट्री पाहायला मिळाली. उत्तर प्रदेशातील ग्रामीण महिला आणि तरुण कलाकारांच्या कामाचा सन्मान करण्यासाठी या दोघांनी खास पारंपरिक कपड्यांमध्ये रॅम्प वॉक केला आणि सर्वांचं लक्ष वेधून घेतलं.
आलियाने यावेळी हस्तिदंती रंगाचा (ivory) एम्ब्रॉयडरी केलेला एथनिक ड्रेस घातला होता. डोक्यावर पांढऱ्या फुलांची नक्षी असलेली पारदर्शक ओढणी, मॅचिंग कॉर्सेट ब्लाउज आणि स्कर्ट असा तिचा लूक होता. कुंदन चोकर, मांग टिका आणि हातातील पारंपरिक दागिन्यांनी तिचं सौंदर्य आणखी खुलून दिसत होतं. दुसरीकडे, विकीने गडद रॉयल ब्लू रंगाचं मखमली शेरवानी जॅकेट घातलं होतं. त्यावर पांढऱ्या रंगाची हेवी फ्लोरल जरदोजी एम्ब्रॉयडरी होती. आतमध्ये पांढरा कुर्ता आणि पांढरी पँट असा त्याचा रुबाबदार लूक होता. या दोघांनी एकत्र रॅम्प वॉक करत शोची शान वाढवली.
Related Articles
'तिकीट टू बॉलिवूड': कलाकुसरीचा उत्सव
'तिकीट टू बॉलिवूड' या नावाने आयोजित या चॅरिटी शोमध्ये मनीष मल्होत्रा आणि मिजवान वेलफेअर सोसायटी या एनजीओच्या १५ वर्षांच्या भागीदारीचं सेलिब्रेशन करण्यात आलं. ज्येष्ठ अभिनेत्री शबाना आझमी या एनजीओचं काम पाहतात. ही संस्था उत्तर प्रदेशातील ग्रामीण महिला आणि तरुण कलाकारांना पारंपरिक चिकनकारी एम्ब्रॉयडरीच्या माध्यमातून सक्षम करण्याचं काम करते.
शोच्या सुरुवातीला शबाना आझमी यांनी समाजातील पुरुषप्रधान मानसिकतेवर भाष्य केलं. महिलांना सक्षम करण्याची आणि तरुण कलाकारांना जागतिक व्यासपीठ मिळवून देण्याची गरज त्यांनी बोलून दाखवली. त्या म्हणाल्या, "आमच्या या कामामुळे आम्ही शतकानुशतके चालत आलेल्या जुन्या परंपरांना आव्हान देऊ शकलो. शेकडो मुलींना बालविवाहातून वाचवू शकलो. हे काम फक्त एका गावात नाही, तर आजूबाजूच्या ४२ गावांमध्ये सुरू आहे. हा एक मोठा बदल आहे.
पुरुषप्रधान मानसिकतेत अडकलेल्या समाजातून महिलांना बाहेर काढण्याचा आणि त्यांना निर्णय प्रक्रियेत आणण्याचा आमचा हा छोटासा प्रयत्न होता. आता त्या स्वतःसाठी उभ्या राहू शकतात आणि स्वतःचे निर्णय घेऊ शकतात. कारण जेव्हा तुम्ही मानसिकता बदलता, तेव्हा फक्त एक व्यक्ती नाही, तर संपूर्ण पिढी बदलते. आम्ही कलाकारांना प्रशिक्षण देतो. मनीष त्यांच्या या कलेला कपड्यांच्या माध्यमातून एक नवं रूप देतो आणि त्यांना एक मोठं व्यासपीठ मिळवून देतो, जे तुम्ही आज पाहणार आहात."
महिला सक्षमीकरणावर शोस्टॉपर्सचं मत
महिला सक्षमीकरणावर भर देणाऱ्या या मिजवान फंडरेझर फॅशन शोचा भाग होता आल्याबद्दल विकी कौशलनेही कृतज्ञता व्यक्त केली. तो म्हणाला, "गेली १५ वर्षे मी खरंच वाट पाहत होतो की माझी वेळ कधी येईल. त्यामुळे मी आज खूप खूश आहे. मला ही संधी दिल्याबद्दल मनापासून धन्यवाद. मी नेहमी मनीषला सांगतो की, जेव्हा मी तुझे कपडे घालतो तेव्हा मला खूप आत्मविश्वास वाटतो. पण आज मला आत्मविश्वासासोबतच एका चांगल्या कामाचा भाग असल्याचा आनंदही मिळतोय."
तो पुढे म्हणाला, "मिजवान वेलफेअर सोसायटी गेल्या १५ वर्षांपासून ग्रामीण महिला आणि मुलींना सक्षम करण्यासाठी जे काम करत आहे, ते खरंच कौतुकास्पद आहे. आजच्या काळात हे खूप महत्त्वाचं आहे. पण मला भविष्यात असं वाटतं आणि मी प्रार्थना करतो की, आपल्याला मिजवानसारख्या संस्थेची गरजच भासू नये. महिलांना सक्षम करण्याची वेळच येऊ नये. माझा मनापासून विश्वास आहे की, महिलांनी फक्त स्वतःचे निर्णय घेण्यासाठी सक्षम होऊ नये, तर त्यांनी त्यांच्या कुटुंबासाठी, समाजासाठी आणि जगासाठी निर्णय घ्यावेत. कारण जेव्हा एखादी महिला निर्णय घेते, तेव्हा तो फक्त तिचा नसतो, तर तो सर्वांच्या भल्यासाठी असतो. मला या कामाचा एक छोटासा भाग बनवल्याबद्दल पुन्हा एकदा धन्यवाद."
आलिया भट्टनेही तिच्या आयुष्यातील महिला सक्षमीकरणावर विचार मांडले. कार्यक्रमात बोलताना ती म्हणाली, "मी खूप सक्षम महिलांच्या सानिध्यात राहते. माझी आई आणि सासूबाई आज इथे उपस्थित आहेत. माझी एक गोड मुलगी आहे, जी आतापासूनच सर्वांवर रुबाब गाजवते आणि आम्हालाही तेच हवं आहे. आपण महिला सक्षमीकरणाबद्दल खूप बोलतो."
ती पुढे म्हणाली, "या महिलांना आणि त्यांच्या कलाकुसरीला जागतिक व्यासपीठ मिळवून देणाऱ्या या ग्लोबल आयकॉनचं काम खरंच अप्रतिम आहे. जेव्हा जेव्हा मिजवानचा शो असतो, तेव्हा आपण अनेक दिवस फक्त याचबद्दल बोलत असतो. हे आपल्या सर्वांच्या लक्षात राहतं. जसं विकी म्हणाला की तो अनेक वर्षांपासून रॅम्पवर येण्याची वाट पाहत होता. मला खूप आनंद आहे की आम्ही आज इथे आहोत, कारण हे खऱ्या अर्थाने सक्षमीकरण आहे."
आगामी चित्रपट
कामाच्या आघाडीवर बोलायचं तर, विकी कौशल, आलिया भट्ट आणि रणबीर कपूर लवकरच 'लव्ह अँड वॉर' या चित्रपटात एकत्र दिसणार आहेत. हा चित्रपट २१ जानेवारी २०२७ रोजी चित्रपटगृहांमध्ये प्रदर्शित होणार आहे.
