आरोपीने आपला मोबाईल फोन ८,००० रुपयांना विकत असल्याचे सांगून मित्राला बोलावले होते.
मीरत: उत्तर प्रदेशातील मीरतमध्ये एका विद्यार्थ्याने आपल्या सहपाठीची हत्या केली आहे. आपल्या फोनमधून प्रेयसीचे फोटो आणि व्हिडिओ चोरून कॉपी केल्याचा आरोप करत बारावीच्या विद्यार्थ्याने आपल्या मित्राची हत्या केली. मृताचे वय १६ वर्षे आहे.
शनिवारी संध्याकाळी मुलगा घरी परतला नाही म्हणून पालकांनी पोलिसांत तक्रार दाखल केली. पालकांनी मुलाला फोन करण्याचा प्रयत्न केला, पण फोन बंद होता. ट्यूशन सेंटरमध्ये चौकशी केली असता त्या दिवशी सुट्टी असल्याचे समजले. त्यानंतर कुटुंबीयांनी पोलिसांकडे धाव घेतली. पोलिसांनी केलेल्या तपासात मृत विद्यार्थी शेवटचा आपल्या मित्राला भेटला होता हे समोर आले. मात्र, आरोपी विद्यार्थ्याने सुरुवातीला पोलिसांना गोंधळात टाकण्याचा प्रयत्न केला. नंतर अधिक चौकशी केल्यानंतर या क्रूर हत्येचा उलगडा झाला.
आरोपीने आपला मोबाईल फोन ८,००० रुपयांना विकत असल्याचे सांगून मित्राला एका निर्जन ठिकाणी बोलावले. मित्रासोबत जेवण करून आणि थोडा वेळ घालवल्यानंतर आरोपीने हा गुन्हा केला. हातोड्याने डोक्यात मारून आरोपीने मित्राची हत्या केली. मृत १६ वर्षीय मुलाचा मृतदेह भवनपूर येथे सापडला आहे. या हत्येत आणखी कोणाचा सहभाग आहे का हे अद्याप स्पष्ट झालेले नाही आणि तपास सुरू असल्याचे मीरतचे एसपी आयुष विक्रम यांनी सांगितले.
