ब्रेकऐवजी अ‍ॅक्सिलरेटर दाबल्याने डॉक्टरचा मृत्यू, सीसीटीव्हीत धक्कादायक घटना कैद

काही सेकंदात होणारे अचातुर्य, दाखवलेली घाई जीवघेणी ठरू शकते. एकतर स्वतःच्या जीवावर बेतते किंवा इतरांचा जीव घेते. अलीकडच्या काळात वाहन चालवताना मोबाईल वापरामुळे होणाऱ्या अपघातांचे प्रमाण वाढले आहे. कानावर मोबाईल ठेवून, डोके खाली घालून दुचाकी चालवणाऱ्यांची संख्या मोठी आहे. तसेच, इयरफोन लावून बोलत जग विसरून स्वतःचाच नव्हे तर इतरांचाही जीव घेणाऱ्या घटनाही रोज घडत असतात. हा फोनचा विषय झाला. पण, छोट्या छोट्या चुकांमुळेही जीव जाण्याच्या घटनाही नेहमीच घडत असतात.

आता अशीच एक भयानक घटना मध्य प्रदेशातील इंदूरमध्ये घडली आहे. ही भयानक घटना सीसीटीव्हीत कैद झाली आहे. एका अचातुर्यामुळे एका डॉक्टरचा बळी गेला आहे. इंदूरमधील एका डॉक्टरने चुकून ब्रेकऐवजी अ‍ॅक्सिलरेटर दाबल्याने अपघात होऊन त्यांचा मृत्यू झाला. घराजवळ पार्किंग करताना ही घटना घडली. सीसीटीव्हीत कैद झालेला हा व्हिडिओ व्हायरल होत आहे.

या व्हिडिओमध्ये पुढे दोन गाड्या पार्क केलेल्या दिसत आहेत. त्यानंतर मागून एक नॅनो कार येताना दिसत आहे. पार्किंग करताना ब्रेकऐवजी अ‍ॅक्सिलरेटर दाबले, असे ड्रायव्हरच्या सीटवर बसलेल्या डॉक्टरने सांगितले. त्यामुळे कार पुढच्या कारला धडकली आणि चोळामोळा झाला. यात डॉक्टरचा मृत्यू झाला असल्याचे वृत्त आहे. हा व्हिडिओ व्हायरल होताच अनेकांनी नॅनो कारबद्दल तक्रार केली आहे. कार व्यवस्थित नाही, तिची रचना वाईट आहे, असे ते म्हणत आहेत. पण, कोणतीही कार असली तरी ब्रेकऐवजी असे अचातुर्य केल्यास कोणत्याही कारमध्ये मृत्यू किंवा हाड-मांस मोडणे सामान्य आहे, असे काही जण कमेंटद्वारे सांगत आहेत.

पोलिसांनी दिलेल्या माहितीनुसार, इंदूरच्या रसोमा चौकात ट्रॅफिक सिग्नलजवळ ही घटना घडली. उभ्या असलेल्या वाहनाला कार धडकल्याने हा अपघात झाला. डॉक्टरची कार नियंत्रण गमावून उभ्या असलेल्या वाहनाला धडकली. डॉक्टरच्या डोक्याला गंभीर दुखापत झाली. त्यांना तातडीने रुग्णालयात दाखल करण्यात आले, मात्र उपचारादरम्यान त्यांचा मृत्यू झाला. पुढच्या कारमध्ये एअरबॅग्ज बसवलेले असल्याने आत बसलेल्या दोघांना गंभीर दुखापत होण्यापासून वाचले. मृत डॉक्टरचे नाव डॉ. मुकेश तिवारी असे आहे.