२५०० कोटींच्या वारसाचा मालक, मित्राची हत्या का?

गेल्या वर्षी युकेमध्ये एका तरुणाने आपल्या रूममेटची क्रूरपणे हत्या केली. २९२ दशलक्ष डॉलर (२५०० कोटी) संपत्तीचा वारस असलेल्या २४ वर्षीय डिलन थॉमसने आपला रूममेट आणि एकमेव मित्र विल्यम बुशची हत्या केली. या क्रूर हत्येपूर्वी डिलनने ऑनलाइन काही माहिती शोधली होती.

गेल्या वर्षी ख्रिसमसच्या आदल्या दिवशी २४ वर्षीय डिलन थॉमसने आपला मित्र आणि रूममेट विल्यम बुशची क्रूरपणे हत्या केली. 'द सन'च्या वृत्तानुसार, दोघेही प्राथमिक शाळेत असल्यापासून एकमेकांना ओळखत होते. काही वर्षांपासून ते दोघेही एकत्र राहत होते. मात्र, बुश आपली प्रेयसी एला जेफ्रीससोबत राहायला जाणार असल्याचे कळताच डिलन संतापला.

डिलन थॉमस हा त्याचे आजोबा सर गिल्बर्ट स्टॅन्ली थॉमस यांनी स्थापन केलेल्या पीटर्स फूड सर्विसेस या केटरिंग कंपनीशी संबंधित २९२ दशलक्ष डॉलरच्या संपत्तीचा वारस होता. २०२३ च्या ख्रिसमसच्या आदल्या दिवशी, आपल्या कुटुंबाला भेटायला जाण्यापूर्वी डिलनने बुशला भेटण्यास सांगितले.

डिलनने त्यापूर्वी मानेच्या शरीररचनेबद्दल ऑनलाइन माहिती शोधली होती असे नंतर आढळून आले. डिलनने बुशला त्याच्या बेडरूममध्ये बोलावून वारंवार चाकूने वार केले. बुशने तिथून पळून जाण्याचा प्रयत्न केला. रक्तस्त्राव होत असतानाही तो पायऱ्यांवरून खाली उतरला, पण डिलनने त्याचा पाठलाग करून त्याला पुन्हा चाकूने वार केले.

अखेर मानेवर वारंवार वार झाल्याने बुश जमिनीवर कोसळला आणि त्याचा मृत्यू झाला. डिलनला कोणतेही मित्र नव्हते. बुशला मात्र अनेक मित्र होते. बुश आणि एला यांनी एकमेकांना डेट करायला सुरुवात केल्यानंतर डिलनच्या स्वभावात बदल झाला. डिलनने बुशला अनेक वेळा तुला मारून टाकीन असे म्हटले होते, असे एलने पोलिसांना सांगितले. नंतर डिलनला अटक करण्यात आली. सध्या तो स्किझोफ्रेनियावर उपचार घेत आहे.