दिल्लीची रहिवासी असलेल्या मेघ सिंग हिच्याशी मंजीतने लग्न केले होते. त्यांच्यातील संबंध बिघडल्यामुळे २०२४ च्या जुलैपासून ते वेगळे राहत होते.
गाझियाबाद: ग्रेटर नोएडामध्ये २९ वर्षीय तरुणाची गोळी मारून हत्या करण्यात आली. गाझियाबादचा रहिवासी मंजीत मिश्रा याची हत्या करण्यात आली. तो गाझियाबादमधील एका बँकेत आयटी अभियंता म्हणून काम करत होता. या प्रकरणी मंजीतची पत्नी आणि तिचा भाऊ यांना ताब्यात घेतल्याचे पोलिसांनी सांगितले.
शुक्रवारी सकाळी दहा वाजता मंजीत मृत अवस्थेत आढळला. रस्त्यावर रक्ताच्या थारोळ्यात तो पडला होता. रस्त्याने जाणाऱ्या पोलीस रिस्पॉन्स वाहनाने गर्दी पाहून गाडी थांबवली आणि तपासणी केली असता हत्येची माहिती मिळाली. तातडीने त्याला रुग्णालयात नेण्यात आले, तेथे त्याला मृत घोषित करण्यात आले, असे पोलिसांनी सांगितले. मंजीतच्या डोक्यात गोळी लागली होती, असे डॉक्टरांनी सांगितले.
मृतदेहाजवळ उभी असलेल्या कारचा नोंदणी क्रमांक तपासून माहिती घेण्यात आली. त्यानंतर कुटुंबीयांना माहिती देण्यात आली. ते आल्यानंतर त्यांनी मंजीतची ओळख पटवली. शुक्रवारी सकाळी ८ वाजता तो घरातून कामावर निघाला होता, असे कुटुंबीयांनी सांगितले.
दिल्लीची रहिवासी असलेल्या मेघ सिंग हिच्याशी मंजीतने लग्न केले होते. २०२४ च्या जानेवारीत त्यांचे लग्न झाले होते. हे प्रेमविवाह होते. या लग्नाला कुणाचाही विरोध नव्हता. मात्र, त्यांच्यातील संबंध बिघडल्यामुळे २०२४ च्या जुलैपासून ते वेगळे राहत होते. मंजीतच्या कुटुंबासोबत राहण्यास मेघने नकार दिला होता. वेगळे राहायचे म्हणून दोघांमध्ये वाद होत असे. नंतर मेघच्या मागणीनुसार दोघेही इंदिरापुरममधील एका भाड्याच्या घरात राहायला गेले. मात्र, त्यांच्यातील वाद संपला नाही. त्यानंतर मंजीतने घटस्फोटाचा अर्ज दाखल केला.
घटस्फोटाचा खटला न्यायालयात सुरू असतानाच ही घटना घडली. मेघ सिंग, तिचे वडील भोपाल सिंग आणि त्यांचे दोन मुलगे यांनी मिळून मंजीतची हत्या केली असल्याचा कुटुंबीयांचा आरोप आहे. मेघच्या वडिलांना आणि दुसऱ्या भावाचा शोध सुरू असल्याचे पोलिसांनी सांगितले.
