पतंजली फूड लिमिटेडचा नफा ₹३७०.९३ कोटी; ७१% वाढ

नवी दिल्ली: बाबा रामदेव यांच्या पतंजली फूड लिमिटेड कंपनीने तिसऱ्या तिमाहीत बंपर नफा कमावला आहे. कंपनीने बाजारातील आपल्या रणनीतीत बदल केले असून, जाहिरातींमुळे डिसेंबर तिमाहीत ७१% निव्वळ नफा मिळवला आहे. शेअर बाजाराला पतंजली फूड लिमिटेडने दिलेल्या माहितीनुसार, डिसेंबर अखेर कंपनीचा निव्वळ नफा ७१.२९% ने वाढून ₹३७०.९३ कोटी झाला आहे. मागील आर्थिक वर्षाच्या याच तिमाहीत कंपनीने ₹२१६.५४ कोटी नफा कमावला होता. 

चालू आर्थिक वर्षाच्या ऑक्टोबर-डिसेंबर कालावधीत कंपनीचे एकूण उत्पन्न ₹९,१०३.१३ कोटी आहे. मागील आर्थिक वर्षाच्या याच कालावधीत कंपनीचे उत्पन्न ₹७,९१०.७० कोटी होते. या काळात कंपनीचा खर्च ₹८,६५२.५३ कोटींवर पोहोचला. मात्र, गेल्या आर्थिक वर्षात कंपनीचा खर्च ₹७,६५१.५१ कोटी होता. गेल्या तिमाहीत कंपनीचा खर्च १३% ने वाढला आहे. 

कोणत्या उत्पादनातून सर्वाधिक उत्पन्न?
खाद्यतेलाच्या विक्रीतून सर्वाधिक उत्पन्न मिळाले आहे, असे पतंजली फूड लिमिटेडने म्हटले आहे. डिसेंबर तिमाहीत एकूण उत्पन्नापैकी खाद्यतेलाचे उत्पन्न ₹६,७१७ कोटी आहे. मागील आर्थिक वर्षाच्या याच तिमाहीत ₹५,४८३ कोटींचे खाद्यतेल विकले गेले होते. खाद्यतेलाच्या विक्रीत २३% वाढ झाली आहे. मात्र, इतर खाद्यपदार्थांच्या विक्रीत १८.४% घट झाली आहे. ₹२,४९९ कोटींवरून ₹२,०३८ कोटींवर विक्री घसरली आहे. 

जाहिरातींवर मोठा खर्च
यावेळी पतंजली फूड लिमिटेडने आपल्या बाजार रणनीतीत मोठे बदल केले. ग्राहकांचा विश्वास संपादन करण्यासाठी आणि सर्व स्तरातील लोकांपर्यंत आपली उत्पादने पोहोचवण्यासाठी जाहिरातींवर मोठी रक्कम खर्च केली. गेल्या तिमाहीच्या एकूण खर्चाच्या २.५% रक्कम जाहिरातींवर खर्च केली आहे. गेल्या १० तिमाहींच्या तुलनेत हा खर्च सर्वाधिक आहे. शिल्पा शेट्टी, शाहिद कपूर, महेंद्रसिंग धोनी आणि भोजपुरी कलाकारांकडून आपल्या उत्पादनांची जाहिरात करून घेत आहे. 

५ वर्षांत ७८% नफा 
या तिमाहीत पतंजली फूड लिमिटेडने आपल्या गुंतवणूकदारांना बंपर नफा दिला आहे. गेल्या एका वर्षात कंपनीच्या गुंतवणूकदारांना १९% नफा मिळाला आहे. ५ वर्षांत पतंजलीने आपल्या गुंतवणूकदारांना ७८% चा उत्तम परतावा दिला आहे. कंपनीच्या शेअर्सची किंमत सध्या ₹१,८५४ आहे. भविष्यातही कंपनीच्या शेअर्समध्ये वाढ होण्याची शक्यता आहे, असे बाजार विश्लेषकांचे मत आहे.