सीरिया संघर्ष : रशियाला का पळाले बशर अल असद?

वर्ल्ड डेस्क: सीरियाची राजधानी दमास्कस बंडखोरांनी ८ डिसेंबर रोजी ताब्यात घेऊन बशर अल-असद यांची सत्ता काढून घेतली. विरोधक येण्यापूर्वीच असद विमानातून पळून गेले होते. ते कुठे गेले हे कोणालाच कळले नाही. त्यांचे विमान कोसळल्याच्या बातम्या येऊ लागल्या. रशियाने नंतर असद तेथे आल्याची पुष्टी केली. असद आणि त्यांच्या कुटुंबीयांना रशियाने आश्रय दिला आहे.

७ डिसेंबर रोजी बंडखोर दमास्कसकडे जात असताना असद कुठेच दिसत नव्हते. असद यांचे रक्षकही त्याच्या घरी तैनात नव्हते. ८ डिसेंबर रोजी बंडखोरांनी दमास्कसवर कब्जा केला आणि असद राजवटीचा अंत घोषित केला. तेव्हा देखील असद यांचा ठावठिकाणा लागत नव्हता.

असद यांचे हवाई दलाच्या इल्युशिन विमानातून पलायन

असद यांच्या ठावठिकाणाविषयी विचारले असता सीरियाचे पंतप्रधान मोहम्मद गाझी अल-जलाली म्हणाले की, शनिवारपासून ते त्यांच्याशी बोलू शकले नाहीत. मात्र, शनिवारी सरकारी माध्यमांनी असद दमास्कसमध्ये असल्याचा दावा केला होता. त्यानंतर, सीरियन ऑब्झर्व्हेटरी फॉर ह्युमन राइट्सचे प्रमुख रामी अब्दुररहमान यांनी सांगितले की, राष्ट्राध्यक्षांनी रविवारी सकाळी दमास्कस सोडले आहे.

FlightRadar24.com ने रविवारी दमास्कस विमानतळावरून इल्युशिन विमान उड्डाण करत असल्याचे दाखवल आहे. त्याच सुमारास बंडखोरांनी शहर ताब्यात घेतले. विमान कुठे गेले हे सांगण्यात आले नाही. शनिवारी रात्री १० वाजता हे विमान टेक ऑफ करणार होते. फ्लाइट रडारने दाखवले की विमानाने उड्डाण केल्यानंतर दमास्कसपासून पूर्वेकडे आणि उत्तर-पश्चिमेकडे उड्डाण केले. यानंतर फ्लाइट ट्रान्सपॉन्डरने सिग्नल पाठवणे बंद केले.

असद यांना रशियाने आश्रय दिला

असद यांच्या ठावठिकाणाचं गूढ अखेर रविवारी रात्री उकललं. असद आणि त्याचे कुटुंब रशियात असल्याची माहिती रशियन वृत्तसंस्थांनी दिली. रशियाने त्यांना आश्रय दिला आहे. वॉल स्ट्रीट जर्नलच्या वृत्तानुसार, इजिप्त आणि जॉर्डनच्या सल्ल्यानुसार असद आपल्या कुटुंबासह मॉस्कोला गेले. असद यांच्याकडे निर्वासनासाठी इराणला जाण्याचा पर्यायही होता, परंतु पुतीन यांच्याशी चांगले संबंध असल्याने त्यांनी रशियाला जाण्याचा निर्णय घेतला.

असद यांनी पळून जाण्यासाठी रशियाची निवड का केली?

असद यांचे रशियाला जाणे आश्चर्यकारक नाही. असद यांची रशियाचे अध्यक्ष व्लादिमीर पुतिन यांच्याशी दीर्घकालीन मैत्री आहे. असद सरकारला रशियाने मदत दिली होती. २०११ मध्ये अरब स्प्रिंग दरम्यान सीरियाला रशियाकडून पूर्ण पाठिंबा मिळाला होता. गृहयुद्धादरम्यान पुतिन यांच्या सैन्याने सीरियातील बंडखोरांच्या स्थानांवर बॉम्बफेक केली. रशियन सैन्यानेही जमिनीवर लढून सरकारी फौजांना मदत केली.

२०१५ मध्ये पुतिन यांनी संयुक्त राष्ट्रात म्हटले होते की असद यांना पाठिंबा देण्यास पश्चिमेकडून नकार देणे ही 'मोठी चूक' होती. सीरियावरील ठराव रोखण्यासाठी रशियाने यूएन सुरक्षा परिषदेत अनेक वेळा आपल्या व्हेटो अधिकारांचा वापर केला आहे.

आणखी वाचा-

मेक्सिकन विमानाचे अपहरण रोखले, प्रवासी ताब्यात

सीरिया संघर्ष: दमास्कसवर बंडखोरांचा ताबा; असद यांचे पलायन