जुगाराचे पैसे उभे करण्यासाठी जिवलग मैत्रिणीसह बारापेक्षा जास्त लोकांना सायनाइड देऊन ठार मारणाऱ्या महिलेला कोर्टाने मृत्युदंडाची शिक्षा सुनावली आहे. कर्ज मागितल्यामुळे मैत्रिणीचा खून केल्यानंतर तिची चार लाखांहून अधिक किमतीची जागाही तिने लाटली होती.
बँकॉक: जुगाराचे पैसे उभे करण्यासाठी जिवलग मैत्रिणीसह बारापेक्षा जास्त लोकांना सायनाइड देऊन ठार मारणाऱ्या महिलेला कोर्टाने मृत्युदंडाची शिक्षा सुनावली आहे. थायलंडला हादरवून सोडणाऱ्या सीरियल किलर प्रकरणात बँकॉक कोर्टाने हा निकाल दिला आहे. सायनाइड हत्येप्रकरणी कोर्टाने दिलेला हा पहिलाच निकाल आहे. सरारत रंगसिवुथापोनने गेल्या वर्षी तिच्या जिवलग मैत्रिणीला अन्नात विष मिसळून ठार मारले होते. त्यानंतर मैत्रिणीची चार लाखांहून अधिक किमतीची जागाही तिने लाटली होती. कर्ज मागितल्यामुळे हा खून झाला होता.
जुगाराच्या आहारी गेलेली ही महिला कर्ज फेडण्यासाठी खून आणि चोरी करत असे. तीन तासांहून अधिक काळ चाललेल्या सुनावणीनंतर बँकॉक कोर्टाने बुधवारी शिक्षा सुनावली. पोलिस अधिकारी असलेल्या माजी पतीशी असलेल्या संबंधांमुळे या प्रकरणाने देशभर लक्ष वेधले होते. मैत्रिणीच्या हत्येप्रकरणी संशयावरून गेल्या मे महिन्यात तिला अटक करण्यात आली तेव्हा ती गर्भवती होती. या प्रकरणाची मोठ्या प्रमाणात चर्चा झाल्यानंतर, तिच्याशी संबंधित असामान्य परिस्थितीत मृत्यूमुखी पडलेल्यांच्या केसेस पोलिसांनी तपासल्या.
दरम्यान, सरारतने विषप्रयोग केला असताना वाचलेल्या एका महिलेने सरारतविरुद्ध जबानी दिली. पोलिस अधिकारी असलेल्या माजी पतीशी चांगले संबंध असल्यामुळेच या घटनेची तक्रार करण्याचा प्रयत्नही केला नाही, असे तिने पोलिसांना सांगितले. खून, कट रचणे, दरोडा असे अनेक गुन्हे सरारतवर दाखल करण्यात आले आहेत. खटल्याच्या सुनावणीदरम्यान सरारतने एकदाही जबानी देण्यास किंवा गुन्हा कबूल करण्यास नकार दिला.
कोर्ट निकाल जाहीर करत असताना पीडितांचे नातेवाईक रडत होते, पण महिलेने कोर्टात उभी राहून कोणतीही प्रतिक्रिया दिली नाही. सुनावणीदरम्यान सरारत वकिलांशी हसत बोलत होती. सरारतच्या माजी पतीलाही कोर्टाने शिक्षा सुनावली आहे. सरारतविरुद्धचे पुरावे नष्ट करण्यासाठी सरकारी वकिलाशी संपर्क साधल्याबद्दल महिलेच्या माजी पतीला दीड वर्षांची कारावासाची शिक्षा सुनावण्यात आली आहे.
