Iran Rescue Mission : पायलटचा तो 3 शब्दांचा मेसेज, अन् अमेरिका हादरली! डोनाल्ड ट्रम्प यांनी सांगितला थरारक किस्सा

Donald Trump Reveals Secret US Rescue Mission in Iran : इराण आणि अमेरिकेतील तणावाच्या काळात, अमेरिकेचे माजी राष्ट्राध्यक्ष डोनाल्ड ट्रम्प यांनी एका मुलाखतीत अशा एका थरारक रेस्क्यू ऑपरेशनचा खुलासा केला आहे.

Image Credit : Getty

डोनाल्ड ट्रम्प यांनी सांगितलं की, या मिशनदरम्यान पायलटच्या फक्त तीन शब्दांच्या रेडिओ मेसेजने व्हाईट हाऊस आणि पेंटागनमधील अधिकाऱ्यांचा थरकाप उडवला होता. आपला पायलट शत्रूच्या जाळ्यात तर अडकला नाही ना, अशी भीती अधिकाऱ्यांना वाटत होती. या मेसेजमुळे अमेरिकेची संपूर्ण योजनाच बदलली.

Image Credit : Getty

इराणच्या सीमेत विमान क्रॅश झाल्यानंतर, जखमी वेपन्स सिस्टम ऑफिसरने आपलं लोकेशन कळवण्यासाठी एक रेडिओ सिग्नल पाठवला. ट्रम्प यांच्या म्हणण्यानुसार, त्या ऑफिसरने 'God is good' (देव महान आहे) असा संदेश दिला. सुरुवातीला अमेरिकन अधिकाऱ्यांना वाटलं की हा इराणने रचलेला सापळा असू शकतो. पायलट जिवंत आहे की इराणी सैन्याने त्याला पकडून त्याच्या रेडिओवरून मेसेज पाठवलाय, याबाबत काही काळ गोंधळ होता. नंतर संरक्षण अधिकाऱ्यांनी तो जिवंत असल्याची खात्री केल्यावर सगळ्यांनी सुटकेचा निश्वास सोडला.

Image Credit : X

जखमी अमेरिकन ऑफिसर २४ तासांपेक्षा जास्त वेळ इराणच्या पहाडी भागात लपून होता. हजारो इराणी सैनिक आणि स्थानिक लोक त्याचा शोध घेत होते. त्याला पकडण्यासाठी बक्षीसही जाहीर करण्यात आलं होतं. तो एका पहाडी दरीत लपला होता आणि शत्रूच्या हाती लागू नये म्हणून सतत आपली जागा बदलत होता. यावेळी अमेरिकन टेहळणी तंत्रज्ञान (surveillance technology) त्याचं लोकेशन ट्रॅक करत होतं, पण प्रत्येक क्षणी धोका कायम होता.

Image Credit : X

या ऑपरेशनचा पहिला टप्पा दिवसा पार पडला, ज्यात F-15 पायलटला प्रचंड गोळीबारातून बाहेर काढण्यात आलं. अमेरिकन अधिकाऱ्यांनी याला एक धाडसी आणि वेगवान कारवाई म्हटलं. पण खरं आव्हान रात्रीच्या मिशनमध्ये होतं, जेव्हा सुमारे २०० सैनिकांच्या मदतीने दुसऱ्या क्रू मेंबरला वाचवण्यासाठी ऑपरेशन राबवण्यात आलं. अमेरिकेने इराणमध्येच एक तात्पुरता तळ बनवून हे मिशन पूर्ण केलं. अंधार, शत्रू आणि अवघड भौगोलिक परिस्थितीमुळे हे रेस्क्यू खूपच जोखमीचं होतं.

Image Credit : Getty

इस्रायलने (Israel) या ऑपरेशनमध्ये मर्यादित पण महत्त्वाची भूमिका बजावली. इस्रायली गुप्तचर यंत्रणेने थेट ऑफिसरचं लोकेशन ट्रॅक करण्यास मदत केली नसली तरी, त्यांनी इराणी सैन्याच्या हालचालींची माहिती दिली. याशिवाय, इस्रायली हवाई दलाने एक स्ट्राईक करून इराणी सैन्याचा वेग कमी केला. डोनाल्ड ट्रम्प यांनी ही भागीदारी मजबूत असल्याचं सांगत दोन्ही देशांनी मिळून हे मिशन यशस्वी केल्याचं म्हटलं.