चीनमध्ये एका ७५ वर्षीय महिलेने गेल्या काही वर्षांत ब्युटी आणि वेलनेस ट्रीटमेंटवर तब्बल ४ कोटी रुपयांपेक्षा जास्त खर्च केल्याचं समोर आलं आहे. त्यांच्या मुलीने बिलांची कागदपत्रं तपासली तेव्हा धक्काच बसला.
बिजिंग : ब्युटी आणि वेलनेस ट्रीटमेंटवर साधारणपणे किती पैसे खर्च होऊ शकतात? पण चीनमधील एका ७५ वर्षीय महिलेने अशा सेवांवर गेल्या काही वर्षांत तब्बल ४ कोटी रुपयांपेक्षा जास्त खर्च केल्याची धक्कादायक घटना समोर आली आहे. हे प्रकरण आता चांगलाच चर्चेचा विषय बनलं आहे.
४ कोटींहून जास्त खर्च... मुलीने कागदपत्रं पाहिली आणि सत्य समोर आलं!
या महिलेच्या मुलीने तिच्या आईच्या खर्चाची कागदपत्रं तपासली, तेव्हा हा प्रचंड खर्च उघडकीस आला. यानंतर तिने मदतीसाठी एका स्थानिक टीव्ही कार्यक्रमाशी संपर्क साधला, असं मीडिया रिपोर्ट्समध्ये म्हटलं आहे.
Related Articles
२०१६ पासून सुरू होत्या ट्रीटमेंट्स!
‘यू’ (Yu) असं आडनाव असलेल्या या ७५ वर्षीय महिला २०१६ पासून 'योंगकी ब्युटी अँड हेअरड्रेसिंग कंपनी' (Yongqi Beauty and Hairdressing Company) आणि त्यांच्याशी संबंधित मेडिकल ब्युटी क्लिनिकच्या ग्राहक होत्या.
त्यांनी स्किन टाइटनिंग, थ्रेड लिफ्ट, मेरिडियन मसाज यांसारख्या अनेक ब्युटी आणि वेलनेस सेवा घेतल्या होत्या. इतकंच नाही, तर आयब्रो आणि लिप टॅटू ट्रीटमेंटसाठीही त्यांनी पैसे भरल्याचं बिलांवरून स्पष्ट झालं आहे.
एका ट्रीटमेंटसाठी तब्बल ६ लाख रुपये!
कुटुंबाचं लक्ष फक्त ट्रीटमेंटच्या संख्येनेच नाही, तर त्यांच्या किमतीनेही वेधून घेतलं. काही सेवांसाठी बाजारातील सामान्य दरापेक्षा १० ते २० पट जास्त पैसे आकारण्यात आले होते. एका रिपोर्टनुसार, एका मल्टी-प्रोसिजर लिप टॅटू ट्रीटमेंटसाठी ३९,८०० युआन, म्हणजेच जवळपास ६ लाख रुपये आकारण्यात आले होते.
वृद्ध ग्राहकांच्या सुरक्षेचा प्रश्न ऐरणीवर
एवढ्या महागड्या सेवा अनेक वर्षं खरेदी करण्यासाठी या महिलेवर दबाव टाकला गेला होता का? किंवा त्यांना योग्य माहिती न देता त्यांची दिशाभूल केली गेली होती का? असे अनेक प्रश्न आता उपस्थित झाले आहेत.
या प्रकरणामुळे ब्युटी आणि वेलनेस क्षेत्रातील मार्केटिंगच्या पद्धतींवर पुन्हा एकदा चर्चा सुरू झाली आहे. विशेषतः वृद्ध ग्राहकांना एखाद्या सेवेची किंमत, तिची गरज आणि खरं मूल्य याबद्दल पारदर्शक माहिती देणं किती महत्त्वाचं आहे, हे या घटनेने पुन्हा एकदा अधोरेखित केलं आहे.
'गरज की मार्केटिंगचा फंडा?'
ही घटना ब्युटी ट्रीटमेंटची खरी गरज आणि ग्राहकांना विकल्या जाणाऱ्या महागड्या पॅकेजेसमधील सीमारेषेवरही प्रश्नचिन्ह निर्माण करते. विशेषतः वृद्ध ग्राहक त्यांच्या शारीरिक बदलांबद्दल जास्त चिंतेत असताना, त्यांना सतत नवनवीन ट्रीटमेंट्स किंवा पॅकेजेस घेण्याचा सल्ला दिला जातो का, हा देखील एक महत्त्वाचा मुद्दा आहे. कोणतीही कॉस्मेटिक किंवा वेलनेस ट्रीटमेंट घेण्यापूर्वी तिची गरज, किंमत, इतर पर्याय आणि अपेक्षित परिणामांबद्दल स्पष्ट माहिती घेणं महत्त्वाचं आहे. 'महागडी ट्रीटमेंट म्हणजे चांगलीच असेल असं नाही', हा संदेश या प्रकरणाने पुन्हा एकदा दिला आहे.
