सॅमसंग कंपनी 20,000mAh बॅटरी असलेला नवीन स्मार्टफोन लॉन्च करणार असल्याची माहिती समोर आली आहे. हे तंत्रज्ञान स्मार्टफोनच्या जगात मोठी क्रांती घडवू शकते. याबद्दलची संपूर्ण माहिती येथे जाणून घ्या.
दक्षिण कोरियाची आघाडीची टेक कंपनी सॅमसंग, आपल्या नवनवीन उत्पादनांनी ग्राहकांना नेहमीच आश्चर्यचकित करते. बजेटमधील गॅलेक्सी 'ए' सीरिजपासून ते भव्य गॅलेक्सी 'एस' सीरिज आणि फोल्डेबल फोन्सपर्यंत, सॅमसंगने बाजारात आपले स्थान निर्माण केले आहे. आता सॅमसंग 20,000 mAh बॅटरी असलेला एक नवीन स्मार्टफोन तयार करत आहे. हा फोन तंत्रज्ञान क्षेत्रात मोठी क्रांती करू शकतो.
मेगा साइज बॅटरी - हा बदल का?
अलीकडच्या काळात स्मार्टफोनचा वापर वाढल्याने, जास्त वेळ चार्जिंग टिकणाऱ्या फोन्सची मागणी वाढली आहे. साधारणपणे, बाजारात उपलब्ध असलेले फोन्स 6,000 mAh किंवा 7,000 mAh बॅटरीसह येतात, जे दिवसभर चालतात. पण, सॅमसंगने आतापर्यंत सुरक्षित मार्ग निवडला होता. जर ही नवीन माहिती खरी ठरली, तर बॅटरी तंत्रज्ञानात सॅमसंग एक मोठी क्रांती घडवण्यास सज्ज आहे, असे म्हणता येईल.
लीक झालेली माहिती आणि तंत्रज्ञान
सोशल मीडिया प्लॅटफॉर्म 'X' (पूर्वीचे ट्विटर) वर @phonefuturist नावाच्या एका टिपस्टरने ही माहिती उघड केली आहे. त्यानुसार, या फोनमध्ये 'ड्युअल-सेल' (Dual-cell) डिझाइन असेल, ज्यामध्ये एक भाग 12,000 mAh आणि दुसरा भाग 8,000 mAh क्षमतेचा असेल, म्हणजेच एकूण 20,000 mAh क्षमता मिळेल. यासाठी सॅमसंग कमी वजनाचे आणि उच्च कार्यक्षमतेचे 'सिलिकॉन-कार्बन' (Silicon-carbon) तंत्रज्ञान वापरणार आहे.
Related Articles
स्क्रीन टाइम आणि चार्जिंग सायकल
या प्रचंड बॅटरीमुळे सुमारे 27 तासांचा सलग स्क्रीन-ऑन टाइम (Screen-on time) मिळेल, असे म्हटले जात आहे. म्हणजेच, दिवसभर व्हिडिओ पाहिल्यानंतर किंवा गेम खेळल्यानंतरही चार्जिंग शिल्लक राहील. शिवाय, ही बॅटरी वर्षाला 960 चार्जिंग सायकल्स (Charging cycles) सहन करू शकते, त्यामुळे बॅटरीचे आयुष्य दीर्घकाळ टिकेल अशी अपेक्षा आहे.
लाँचची तारीख आणि अपेक्षा
हा स्मार्टफोन कधी लाँच होईल, याबद्दल सॅमसंगने अद्याप कोणतीही अधिकृत घोषणा केलेली नाही. याचे डिझाइन कसे असेल किंवा हे कोणासाठी बनवले जात आहे, याबद्दलची माहितीही गुलदस्त्यात आहे. तथापि, जे लोक सतत प्रवास करतात आणि फोनचा जास्त वापर करतात, त्यांच्यासाठी हे एक वरदान ठरू शकते. सॅमसंग अधिकृत घोषणा करेपर्यंत ही माहिती केवळ एक अफवा मानली पाहिजे, पण जर हे खरे ठरले तर स्मार्टफोनच्या जगात हा एक मैलाचा दगड ठरेल.
