EPFO पेन्शनधारकांसाठी मोठी बातमी!, आता कोणत्याही बँकेतून मिळेल पेन्शन

EPFO (कर्मचारी भविष्य निर्वाह निधी संघटना) च्या 68 लाख पेन्शनधारकांसाठी एक आनंदाची बातमी आहे! सेवानिवृत्तीनंतर जे पेन्शनधारक आपल्या गावी जाऊन राहत असतात, त्यांना पेन्शन मिळवण्यासाठी बँकेची चकरा माराव्या लागतात. पण आता EPFO ने पेन्शनधारकांसाठी एक मोठा बदल केलेला आहे. पुढे आता पेन्शन काढण्यासाठी बँक बदलली तरी काहीच अडचण येणार नाही.

कर्मचारी भविष्य निर्वाह निधी संघटनेने (EPFO) त्यांच्या पेन्शनधारकांसाठी केंद्रीकृत पेन्शन पेमेंट सिस्टम (CPPS) सुरू केली आहे. यामध्ये पेन्शनधारक आता कोणत्याही बँकेतून त्यांच्या पेन्शनची रक्कम सहजपणे काढू शकतील. त्यासाठी पेन्शन पेमेंट ऑर्डर (PPO) ची आवश्यकता नाही, आणि पेन्शन सुरू करण्यासाठी बँकेमध्ये जाऊन पडताळणीची प्रक्रिया देखील संपुष्टात येईल.

CPPS प्रणालीचे फायदे

कोणत्याही बँकेतून पेन्शन काढता येईल - पेन्शनधारकांना त्यांच्या निवृत्तीवेतनाचा लाभ काढण्यासाठी बँक बदलल्यास काही अडचण येणार नाही.

पेन्शन रक्कम तत्काळ जमा – पेन्शन जारी झाल्यानंतर ती त्वरित संबंधित बँक खात्यात जमा होईल.

सीमित कागदपत्रांची आवश्यकता – बँकेत जाऊन पेन्शन सुरू करताना पुन्हा-पुन्हा पडताळणीसाठी कागदपत्रांची आवश्यकता नाही.

जानेवारी 2025 पासून देशभरात CPPS प्रणाली अंमलात येईल. यामुळे पेन्शनधारकांसाठी खूप सोयीस्कर होईल, खास करून जे गावी राहून पेन्शन काढतात. तसेच, केंद्र सरकारच्या या उपक्रमामुळे पेन्शनधारकांना अधिक आरामदायक आणि सुलभ सेवा मिळेल.

सर्वप्रथम, कर्नाल, जम्मू आणि श्रीनगर प्रादेशिक कार्यालयांमध्ये CPPS प्रणाली लागू करण्यात आली आणि यामध्ये 49,000 पेन्शनधारकांना एकूण 11 कोटी रुपयांची पेन्शन वितरित केली गेली. त्यानंतर नोव्हेंबरमध्ये 24 प्रादेशिक कार्यालयांमध्ये दुसरा पायलट प्रोजेक्ट सुरू झाला, जिथे 9.3 लाख पेन्शनधारकांना 213 कोटी रुपयांची पेन्शन वितरित करण्यात आली.

हे एक ऐतिहासिक पाऊल : केंद्रीय मंत्री मनसुख मांडविया

केंद्रीय मंत्री मनसुख मांडविया यांनी यासंदर्भात सांगितले की, CPPS प्रणाली लागू झाल्यानंतर, पेन्शनधारकांना त्यांच्या पेन्शनची रक्कम कोणत्याही बँकेतील कोणत्याही शाखेतून, देशाच्या कोणत्याही भागात मिळवता येईल. हे एक ऐतिहासिक पाऊल आहे, जे पेन्शन सेवा अधिक कार्यक्षम आणि सुलभ बनवेल.

काय आहे पुढे?

सर्व 122 EPFO प्रादेशिक कार्यालयांमध्ये CPPS प्रणाली पूर्णपणे लागू केली जाईल. यामुळे 68 लाख पेन्शनधारकांना 1,570 कोटी रुपयांची पेन्शन वितरण प्रक्रिया पार पडेल. ह्या परिवर्तनामुळे कर्मचारी भविष्य निर्वाह निधी संघटनेच्या सर्व 68 लाख पेन्शनधारकांना अधिक सोयीस्कर आणि जलद सेवा मिळणार आहे. नोकरी पूर्ण केल्यानंतर, EPFO च्या पेन्शनधारकांसाठी ही एक मोठी क्रांतिकारी सुविधा ठरली आहे.

या नव्या सुविधा अंतर्गत, EPFO पेन्शनधारकांना त्यांच्या पेन्शनचा लाभ मिळवण्यासाठी कितीही बँक बदलली तरी त्यांना कोणतीही अडचण येणार नाही. EPFO च्या CPPS प्रणालीने पेन्शनधारकांच्या जीवनात एक महत्त्वाचा बदल घडवला आहे, आणि आता त्यांना त्यांची पेन्शन रक्कम लवकर आणि सोयीस्करपणे मिळणार आहे.