Travel Insurance: मध्य-पूर्वेतील तणावामुळे अनेक विमानसेवा विस्कळीत झाल्या आहेत आणि कित्येक प्रवासी अडकून पडले आहेत. अशा परिस्थितीत विमान रद्द झाल्यास, उपचाराची गरज लागल्यास लाइफ इन्शुरन्सचं संरक्षण कितपत मिळतं, हे समजून घेऊया.
मध्य-पूर्वेतील संघर्ष पेटल्यामुळे त्या भागातील विमानसेवांचं वेळापत्रक पूर्णपणे कोलमडलं आहे. अनेक विमानं रद्द झाली आहेत किंवा त्यांचे मार्ग बदलण्यात आले आहेत. यामुळे शेकडो भारतीय प्रवासी वेगवेगळ्या देशांतील विमानतळांवर अडकून पडले आहेत. अशा आणीबाणीच्या परिस्थितीत तुमचा ट्रॅव्हल इन्शुरन्स आणि लाइफ इन्शुरन्स किती कामी येतो, हे पाहूया.
1. विमान उशिरा सुटल्यास किंवा रद्द झाल्यास क्लेम मिळेल का?
परदेशात प्रवास करणारे बहुतेक जण ट्रॅव्हल इन्शुरन्स काढतात. पण सध्याच्या परिस्थितीत क्लेम मिळणं दोन महत्त्वाच्या गोष्टींवर अवलंबून आहे:
पॉलिसी कधी घेतली: ज्यांनी हा संघर्ष सुरू होण्यापूर्वी पॉलिसी घेतली आहे, त्यांनाच क्लेम मिळण्याची शक्यता आहे. समस्या सुरू झाल्यावर पॉलिसी घेतली असेल, तर 'ही घटना आधीच माहिती होती' असं कारण देऊन कंपनी क्लेम नाकारू शकते.
Related Articles
'युद्ध' ही अट: बहुतेक इन्शुरन्स पॉलिसींमध्ये 'युद्धामुळे' होणाऱ्या नुकसानीला संरक्षण मिळत नाही. पण विमानतळ बंद झाल्यामुळे किंवा तांत्रिक कारणांमुळे विमान रद्द झालं, तर 'ट्रिप डिले' (प्रवासास उशीर) अंतर्गत तुम्हाला काही प्रमाणात भरपाई मिळू शकते.
2. उपचारासाठी मदत मिळेल का?
परदेशात असताना सामान्य आजारपण किंवा अपघात झाल्यास ट्रॅव्हल इन्शुरन्स उपचाराचा खर्च देतो. पण,
युद्धामुळे झालेली इजा: मिसाइल हल्ला किंवा गोळीबारात जखमी झाल्यास, ९९ टक्के इन्शुरन्स कंपन्या उपचाराचा खर्च देत नाहीत. कारण या घटना 'युद्ध' या प्रकारात मोडतात.
विशेष पॉलिसी: पत्रकार, पॅरामेडिकल स्टाफ यांसारख्या लोकांसाठी खास ग्रुप इन्शुरन्स पॉलिसी उपलब्ध असतात. यामध्ये युद्धक्षेत्रातही संरक्षण मिळतं. पण अशा पॉलिसींचा प्रीमियम खूप जास्त असतो.
3. लाइफ इन्शुरन्सचं काय?
साधारणपणे टर्म इन्शुरन्स पॉलिसी जगभरात कुठेही संरक्षण देतात.
परदेशात नैसर्गिक कारणांमुळे मृत्यू झाल्यास क्लेम मिळण्यात कोणतीही अडचण येत नाही.
मात्र, युद्धात थेट सहभागी झाल्यामुळे किंवा युद्धाच्या परिस्थितीत मृत्यू झाल्यास, पॉलिसीमधील अटी आणि शर्तींनुसारच पैसे मिळतात. प्रत्येक कंपनीचे नियम वेगवेगळे असू शकतात.
4. परदेशात मृत्यू झाल्यास काय करावं?
जर तुमच्याकडे इन्शुरन्स संरक्षण असेल, तर मृतदेह मायदेशी आणण्याचा खर्च कंपनी उचलते. नसल्यास, हा खर्च कुटुंबाला करावा लागतो. ज्यांची आर्थिक परिस्थिती बिकट आहे, ते मदतीसाठी सरकारच्या निधीमधून अर्ज करू शकतात.
