कांद्यावरील काळे डाग: आरोग्यासाठी धोकादायक?

बाजारातून आणलेल्या कांद्यावर कधी कधी काळे डाग दिसतात. हे डाग नेमके काय असतात आणि त्यांचे आरोग्यावर काय परिणाम होतात हे जाणून घ्या. काळजी न घेतल्यास धोका संभवतो. 

स्वयंपाकात कांदा हा अत्यावश्यक घटक आहे. वरण, भाजी, पदार्थ कोणताही असो, कांदा लागतोच. म्हणूनच आपण किलोच्या किलो कांदा खरेदी करतो. कांदा हा स्वयंपाकाची चव वाढवतोच, शिवाय आरोग्यासाठीही खूप फायदेशीर आहे.

रक्तातील साखरेची पातळी नियंत्रित करण्यापासून ते चमकदार त्वचा, वजन कमी करणे, मजबूत हाडे, निरोगी हृदय आणि चांगले पचन यासाठी कांदा मदत करतो. पण कांद्याचा योग्य वापर न केल्यास त्याचे तोटेही आहेत.

बऱ्याचदा आपण बाजारातून आणलेल्या कांद्याची साल काढताना त्यावर काळ्या रंगाचे धुळीसारखे डाग दिसतात. स्पर्श केल्यास हाताला चिकटणारे हे डाग मातीचे कण असल्यासारखे वाटतात, पण हे नेमके काय आहे हे माहिती आहे का? बुरशी.

होय, हे काळे डाग 'अ‍ॅस्परजिलस नायगर' नावाच्या एका विशिष्ट प्रकारच्या बुरशीमुळे होतात. ही बुरशी मातीत आढळते आणि कांद्यावरही दिसू शकते. ही बुरशी ब्लॅक फंगस सारखा गंभीर आजार जरी उद्भवत नसली तरी आरोग्यासाठी हानिकारक आहे.

म्हणूनच बुरशी असलेला कांदा खाणे टाळावे. कारण ही बुरशी अ‍ॅलर्जी निर्माण करू शकते. विशेषतः अ‍ॅलर्जी असलेल्या व्यक्तींनी असा कांदा खाऊ नये.

दमा किंवा श्वसनाचा त्रास, फुफ्फुसाचा त्रास असल्यासही असा कांदा खाऊ नये. यामुळे आरोग्याला धोका निर्माण होऊ शकतो. सर्वच कांद्यावर असे डाग असतात का आणि त्याचे काय करावे असा प्रश्न तुम्हाला पडला असेल.

तुमच्या प्रश्नाचे उत्तर आमच्याकडे आहे. कांद्यावर काळे डाग असल्यास, त्याचे वरचे दोन थर काढून टाका. ही बुरशी सहसा वरच्या एक-दोन थरांमध्येच असते. दोन थर काढून कांदा चांगला धुवून वापरा.

कांद्यासोबत काळी बुरशी दिसल्यास, तो कांदा लगेच फेकून द्या. तो वापरण्याचा विचारही करू नका. कारण यामुळे काही गंभीर आजार होऊ शकतात. म्हणूनच असा कांदा टाळणेच उत्तम.