Balcony Garden: तुमच्या घराला कमी बजेटमध्ये हिरवागार आणि फ्रेश लूक द्यायचाय? मग हँगिंग प्लांट्स हा उत्तम पर्याय आहे. अशा 4 रोपांबद्दल जाणून घ्या, जी जास्त काळजी न घेताही वर्षभर हिरवीगार ठेवता येतात.
Balcony Garden: होम गार्डन म्हणजे गॅलरी, खिडकी किंवा गच्चीवर कुंडीत झाडे लावणे. ताजी भाजी, फुले आणि औषधी वनस्पतींसाठी हे उत्तम आहे. चांगली माती, पुरेसा सूर्यप्रकाश, नियमित पाणी आणि सेंद्रिय खत वापरून तुम्ही छोटी जागाही नंदनवन बनवू शकता, ज्यामुळे घरात प्रसन्नता व आरोग्य टिकून राहते. कुंड्यांप्रमाणेच हॅंगिंग कुंड्यांमध्येही झाडे लावता येतात. या प्रकारच्या कुंड्या हुकवर अडकवून घरात हिरवळ तयार करता येते.
आपलं घर सुंदर दिसावं असं प्रत्येकाला वाटतं, पण कधीकधी बजेटमुळे ते शक्य होत नाही. जर तुम्हालाही तुमची बाल्कनी किंवा खिडकी सजवायची असेल, तर हँगिंग पॉटमधली झाडं हा एक उत्तम पर्याय आहे. ही झाडं कमी जागेत जास्त हिरवळ देतात आणि घराला एक फ्रेश लूकही देतात. चला तर मग, अशा ४ हँगिंग प्लांट्सबद्दल जाणून घेऊया, ज्यांची जास्त काळजी न घेताही तुम्ही तुमच्या बागेत सहज वाढवू शकता.
डंकी टेल (How To Grow Donkey Tail)
डंकी टेलला 'Burro's Tail' असंही म्हणतात. हे एक खूप सुंदर दिसणारं सेक्युलेंट प्रकारातलं रोपटं आहे. त्याच्या खाली लटकणाऱ्या लांब फांद्या खूप आकर्षक दिसतात. हे रोपटं लावणं खूप सोपं आहे, फक्त काही गोष्टी लक्षात ठेवाव्या लागतील.
- डंकी टेलसाठी सिरॅमिकची कुंडी वापरा, जेणेकरून जास्त ओलावा राहणार नाही.
- साध्या मातीऐवजी कॅक्टस+सेक्युलेंट मिक्स माती वापरा.
- डंकी टेलला जास्त हाताळलेलं आवडत नाही, त्यामुळे त्याला सारखं स्पर्श करू नका.
- याला थेट उन्हात न ठेवता अशा ठिकाणी ठेवा जिथे इनडायरेक्ट सूर्यप्रकाश येईल.
- माती पूर्ण सुकल्यावर १०-१५ दिवसांतून एकदा पाणी द्या.
- टीप- या रोपट्याची पानं लवकर गळतात, त्यामुळे ते अशा ठिकाणी लटकवा जिथे लोकांचा हात सारखा लागणार नाही.
बेबी सनरोज (Baby Sunrose Hanging Home Plant)
ज्या लोकांना झाडांची काळजी घ्यायला जास्त वेळ मिळत नाही, त्यांच्यासाठी बेबी सनरोज प्लांट उत्तम आहे. हे रोपटं त्याच्या लहान, रंगीबेरंगी फुलांसाठी ओळखलं जातं. या रोपट्याला हलकं ऊन आणि कमी पाणी लागतं.
- हे रोपटं बियांऐवजी फांदीच्या कटिंगपासून लावा.
- पाण्याचा चांगला निचरा होण्यासाठी रेताड माती वापरा.
- कटिंग मातीत लावून अशा ठिकाणी ठेवा जिथे ऊन येत असेल.
- उन्हातच याला गुलाबासारखी छोटी फुलं येतात.
- माती सुकल्यावरच पाणी द्या.
- हे रोपटं वेगाने पसरतं आणि वर्षभर हिरवंगार राहतं.
वॉन्डरिंग ज्यू (Wandering Jew Plant)
जर तुम्हाला हिरव्या पानांव्यतिरिक्त काहीतरी वेगळं हवं असेल, तर तुम्ही जांभळ्या रंगाचं वॉन्डरिंग ज्यू हे हँगिंग प्लांट निवडू शकता. याला हलकं ऊन आणि रोज पाण्याची गरज असते. विशेष म्हणजे, हे रोपटं मातीत आणि पाण्यात, दोन्ही ठिकाणी सहज वाढतं.
- वॉन्डरिंग ज्यू लावण्यासाठी कटिंगचा वापर करा.
- खालची पानं काढून फांदी ओलसर मातीत दाबा.
- रोपट्याला इनडायरेक्ट सूर्यप्रकाशात ठेवा, म्हणजे त्याची वाढ चांगली होईल.
- या प्लांटला ओलावा आवडतो, त्यामुळे रोज पाणी द्या.
टर्टल वाईन (Turtle Vine Plant)
या हँगिंग प्लांटची पानं कासवाच्या पाठीच्या आकाराची, छोटी-छोटी असतात. याला जास्त देखभालीची गरज नसते. तुम्ही याला हँगिंग बास्केटमध्ये किंवा कुंडीत लावू शकता.
- टर्टल वाईन लावणं खूप सोपं आहे. याच्या प्रत्येक नोड (गाठी) मधून मुळं येतात, त्यामुळे फांदी मातीत लावून नवीन रोपटं तयार करता येतं.
- या रोपट्यासाठी हलकी आणि भुसभुशीत माती वापरा.
- या रोपट्याला थेट ऊन आवडत नाही, त्याला अप्रत्यक्ष प्रकाश जास्त मानवतो.
- टर्टल वाईनला स्प्रे बॉटलने पाणी द्या, जास्त ओलाव्यामुळे रोपटं खराब होऊ शकतं.
