Washington Sundar Injury Puts T20 World Cup Spot In Doubt : वॉशिंग्टन सुंदरला दुखापत झाल्याने T20 विश्वचषकासाठी भारतीय संघात बदल होण्याची शक्यता आहे. तिलक वर्माच्या दुखापतीमुळे संघ आधीच चिंतेत असताना आता सुंदरलाही दुखापत झाली आहे.
Washington Sundar Injury Puts T20 World Cup Spot In Doubt : पुढील महिन्यात भारत आणि श्रीलंकेत होणाऱ्या T20 विश्वचषकासाठी भारतीय संघात बदल होण्याची शक्यता आहे. आधी जाहीर झालेल्या १५ सदस्यीय संघातील फिरकी अष्टपैलू खेळाडू वॉशिंग्टन सुंदरला दुखापत झाल्याने संघात बदलाची शक्यता निर्माण झाली आहे. न्यूझीलंडविरुद्धच्या एकदिवसीय मालिकेतील पहिल्या सामन्यात दुखापतग्रस्त झालेला सुंदर फक्त पाच षटके टाकून मैदानाबाहेर गेला होता. नंतर तो फलंदाजीसाठी आला, पण त्याला एकदिवसीय मालिकेतील उर्वरित सामने आणि त्यानंतर होणाऱ्या T20 मालिकेत खेळता येणार नाही, असे बीसीसीआयने स्पष्ट केले होते.
मात्र, सुंदरच्या दुखापतीतून बरे होण्यासाठी काही महिने लागतील, असा नवीन अहवाल आहे. त्यामुळे पुढील महिन्यात होणाऱ्या T20 विश्वचषकात सुंदर खेळण्याबाबत शंका असल्याचे क्रिकबझने म्हटले आहे. पुढील महिन्यात ७ तारखेला मुंबईत अमेरिकेविरुद्ध भारताचा T20 विश्वचषकातील पहिला सामना आहे. त्याआधी दुखापतीतून सावरून सुंदर फिटनेस मिळवू शकेल की नाही, याबाबत शंका आहे. त्यामुळे विश्वचषक संघात सुंदरच्या जागी कोण येणार, याची उत्सुकता चाहत्यांना लागली आहे.
न्यूझीलंडविरुद्धच्या एकदिवसीय मालिकेत सुंदरच्या जागी दिल्लीचा युवा खेळाडू आयुष बडोनीला निवड समितीने संधी दिली होती. मात्र, T20 मालिकेत सुंदरचा बदली खेळाडू कोण असेल, हे अद्याप जाहीर केलेले नाही. T20 सामन्यांमध्ये फारसा चांगला रेकॉर्ड नसलेल्या बडोनीचा न्यूझीलंडविरुद्धच्या T20 मालिकेसाठी किंवा विश्वचषक संघासाठी विचार होण्याची शक्यता कमी आहे.
Related Articles
या महिन्याच्या ३१ तारखेपर्यंत बीसीसीआयला विश्वचषकाच्या १५ सदस्यीय संघात बदल करता येणार आहे. त्यानंतर आयसीसीच्या परवानगीनेच संघात बदल करता येईल. विजय हजारे ट्रॉफीदरम्यान जखमी झालेला तिलक वर्मा विश्वचषक संघात खेळणार की नाही, याबाबतही शंका आहे. विश्वचषकाच्या पहिल्या फेरीतील सामन्यांमध्ये तो खेळला नाही, तरी किमान सुपर-८ मध्ये तरी त्याला खेळवता येईल का, याचा विचार निवड समिती करत आहे.
