PR Sreejesh First Owner of New 2026 Yezdi Roadster Green Mamba : ऑलिम्पिक पदक विजेता आणि हॉकीपटू पी.आर. श्रीजेश, नव्या '2026 येझदी रोडस्टर' बाईकचा पहिला भारतीय ग्राहक ठरला आहे. त्याने 'येझदी ग्रीन मांबा रोडस्टर' मॉडेलची डिलिव्हरी घेतली आहे.
नवी दिल्ली : ऑलिम्पिक पदक विजेता आणि भारतीय हॉकी टीमचा माजी कॅप्टन पी.आर. श्रीजेशने एक नवा विक्रम केला आहे. जावा-येझदी मोटरसायकल्सने नुकतीच लाँच केलेली '2026 येझदी रोडस्टर' बाईक खरेदी करणारा तो भारतातला पहिला ग्राहक ठरला आहे. श्रीजेशने खास 'येझदी ग्रीन मांबा रोडस्टर' या मॉडेलची डिलिव्हरी घेतली आहे.
काही दिवसांपूर्वी केरळमध्ये झालेल्या राष्ट्रीय लाँचिंग कार्यक्रमात श्रीजेशने ही बाईक पाहिली होती. तिची खास स्टाईल आणि रॉयल लूक पाहून तो खूपच इम्प्रेस झाला होता. आता तीच बाईक त्याने खरेदी केली आहे. मैदानात आपल्या जबरदस्त खेळाने प्रतिस्पर्ध्यांना रोखून धरणारा 'द वॉल' म्हणून ओळखल्या जाणाऱ्या श्रीजेशच्या व्यक्तिमत्त्वाला ही येझदी रोडस्टर बाईक अगदी शोभून दिसते.
काय आहे 'ग्रीन मांबा रोडस्टर'ची खासियत?
रस्त्यावरून जाताना प्रत्येकाने एकदा तरी वळून पाहावं, असं या बाईकचं आकर्षक डिझाइन आहे. या बाईकला मॅट-ग्रीन रंग दिला असून, अरेबिका-ब्राऊन रंगाची कुशन सीट आणि कॉपर रंगाचे डीकॅल्स (decals) आहेत. यामुळे बाईकचा लूक आणखीनच आकर्षक दिसतो.
Related Articles
यात 334cc क्षमतेचं लिक्विड-कूल्ड अल्फा2 इंजिन आहे. सोबतच 6-स्पीड गिअरबॉक्स, असिस्ट अँड स्लिपर क्लच, ABS आणि मॉड्युलर सीटिंगसारखे अत्याधुनिक फीचर्सही यात आहेत.
माजी कॅप्टन श्रीजेशने व्यक्त केला आनंद
बाईक खरेदी केल्यानंतर आपला आनंद व्यक्त करताना श्रीजेश म्हणाला, "मैदानावरचं आयुष्य जेवढं महत्त्वाचं आहे, तेवढंच मैदानाबाहेरचं आयुष्यही महत्त्वाचं आहे, असं मी मानतो. कोचीमध्ये झालेल्या कार्यक्रमात या बाईकचं डिझाइन आणि लूक मला पहिल्या नजरेतच आवडलं होतं. येझदी बाईक्सचा एक मोठा इतिहास आहे, जो अनेक पिढ्यांनी पाहिला आहे. मला त्या इतिहासाचा एक भाग व्हायचं होतं. मैदान असो, रस्ता असो किंवा आयुष्य, आपल्याला जे आवडतं त्याचा पाठलाग आपण केलाच पाहिजे, याची आठवण ही बाईक मला करून देते."
यावर बोलताना जावा-येझदीची मूळ कंपनी 'क्लासिक लेजेंड्स'चे सह-संस्थापक अनुपम थरेजा म्हणाले, "रोडस्टर बाईक म्हणजे धैर्य, आत्मविश्वास आणि चॅलेंजर स्पिरिट. श्रीजेशसारखा महान खेळाडू या बाईकचा पहिला ग्राहक बनल्याचा आम्हाला खूप आनंद आहे. त्याची जिद्द आणि यश आमच्या ब्रँडसाठी आरशासारखं आहे. श्रीजेशसोबत आमच्या 2026 च्या नव्या बाईक सिरीजचा प्रवास सुरू होणं, ही आमच्यासाठी खूपच रोमांचक गोष्ट आहे."
'ग्रीन मांबा रोडस्टर'पासून डिलिव्हरीला सुरुवात
श्रीजेशला 'ग्रीन मांबा रोडस्टर'ची डिलिव्हरी देण्यासोबतच, येझदीच्या 2026 च्या नव्या सिरीजच्या बाईक्सची डिलिव्हरी संपूर्ण भारतात अधिकृतपणे सुरू झाली आहे.
क्लासिक लेजेंड्स या कंपनीची स्थापना जावा, येझदी आणि बीएसए (BSA) सारख्या आयकॉनिक मोटरसायकल ब्रँड्सना भारत आणि जागतिक बाजारपेठेत पुन्हा एकदा नवसंजीवनी देण्याच्या उद्देशाने झाली आहे. ग्राहकांना एक उत्तम मोटरसायकलिंगचा अनुभव देणं हे या कंपनीचं मुख्य ध्येय आहे.
