Mumbai Metro 8 : मुंबई–नवी मुंबई विमानतळ थेट मेट्रोने जोडले जाणार! मेट्रो लाईन 8 वरील 20 स्थानकांची संपूर्ण यादी

Mumbai Metro 8 : राज्य मंत्रिमंडळाने मुंबई मेट्रो लाईन 8 ला मंजुरी दिली आहे, जी मुंबई आणि नवी मुंबईतील आंतरराष्ट्रीय विमानतळांना थेट जोडेल. हा 35 किलोमीटरचा मार्ग PPP मॉडेलवर उभारला जाणार असून, यामुळे दोन्ही विमानतळांमधील प्रवास सुलभ आणि वेगवान होईल.

Image Credit : Getty

मुंबई–नवी मुंबई विमानतळ थेट मेट्रोने जोडले जाणार!

मुंबई : मुंबईतील छत्रपती शिवाजी महाराज आंतरराष्ट्रीय विमानतळ आणि नवी मुंबईतील नव्या आंतरराष्ट्रीय विमानतळाला थेट जोडणाऱ्या मेट्रो लाईन 8 ला राज्य मंत्रिमंडळाने मंजुरी दिली आहे. मुख्यमंत्री देवेंद्र फडणवीस यांच्या अध्यक्षतेखाली मंगळवारी (27 जानेवारी) झालेल्या मंत्रिमंडळ बैठकीत हा महत्त्वाचा निर्णय घेण्यात आला. ही मुंबई मेट्रोची आठवी लाईन असून, ती दोन्ही प्रमुख विमानतळांना थेट जोडणारी पहिली मेट्रो सेवा ठरणार आहे. या मेट्रो मार्गामुळे प्रवासी, एअरलाईन क्रू, कार्गो ऑपरेटर तसेच रेल्वे प्रवाशांना मोठा दिलासा मिळणार आहे. 

Image Credit : ANI

मेट्रो लाईन 8 चा मार्ग आणि लांबी

मुख्यमंत्र्यांनी बैठकीत मेट्रो लाईन 8 चा सविस्तर आराखडाही मांडला.

या मेट्रो मार्गाची एकूण लांबी 35 किलोमीटर असून, त्यापैकी

9.25 किमी भूमिगत मार्ग,

24.636 किमी उन्नत (Elevated) मार्ग असणार आहे.

या मार्गावर एकूण 20 स्थानके असतील. त्यामध्ये 6 भूमिगत आणि 14 उन्नत स्थानकांचा समावेश आहे. लवकरच प्रत्यक्ष कामाला सुरुवात करण्यात येणार असल्याचे मुख्यमंत्र्यांनी स्पष्ट केले. 

Image Credit : X

Mumbai Metro Line 8 : नियोजित 20 स्थानकांची यादी

मेट्रो लाईन 8 वरील प्रस्तावित स्थानके पुढीलप्रमाणे आहेत.

छत्रपती शिवाजी महाराज आंतरराष्ट्रीय विमानतळ – टर्मिनल 2

फिनिक्स मॉल

एस. जी. बर्वे मार्ग

कुर्ला

लोकमान्य टिळक टर्मिनस (LTT)

गरोडिया नगर

बैगनवाडी

मानखुर्द

ISBT

वाशी

सानपाडा

जुईनगर

एल. पी. जंक्शन

नेरुळ स्टेशन

सीवूड्स स्टेशन

अपोलो हॉस्पिटल

सागर संगम

तारघर

नवी मुंबई आंतरराष्ट्रीय विमानतळ – पश्चिम

नवी मुंबई आंतरराष्ट्रीय विमानतळ – टर्मिनल 2

छत्रपती शिवाजी महाराज आंतरराष्ट्रीय विमानतळ टर्मिनल 2 ते घाटकोपर पूर्व हा मार्ग भूमिगत असणार असून, घाटकोपर पश्चिम ते नवी मुंबई आंतरराष्ट्रीय विमानतळ टर्मिनल 2 पर्यंतचा मार्ग उन्नत असेल. 

Image Credit : X

प्रकल्पाचा खर्च आणि भूसंपादन

दोन स्थानकांमधील सरासरी अंतर 1.9 किमी असेल. या प्रकल्पासाठी सुमारे 30.7 हेक्टर भूसंपादन आवश्यक असून, त्यासाठी अंदाजे 388 कोटी रुपये खर्च अपेक्षित आहे. संपूर्ण मेट्रो प्रकल्पाचा एकूण खर्च सुमारे 22,862 कोटी रुपये असल्याचा अंदाज आहे. 

Image Credit : X

PPP मॉडेलवर मेट्रो उभारणार

राज्य सरकारने हा प्रकल्प PPP (Public-Private Partnership) मॉडेल अंतर्गत उभारण्यास मंजुरी दिली आहे.

राज्य सरकार – 20%

केंद्र सरकार – 20% (व्हायबिलिटी गॅप फंडिंग)

उर्वरित 60% खर्च खासगी कंपनी करणार

मुख्यमंत्र्यांनी अधिकाऱ्यांना जमिनीचे अधिग्रहण, विविध परवानग्या आणि आवश्यक मंजुरीची प्रक्रिया जलद पूर्ण करून पुढील तीन वर्षांत संपूर्ण प्रकल्प पूर्ण करण्याचे निर्देश दिले आहेत.