- Home
- Mumbai
- मुंबईकरांचा प्रवास होणार सुखकर! पुढील ५ वर्षात ७००+ नव्या लोकल धावणार; गर्दीतून मिळणार कायमची सुटका?
मुंबईकरांचा प्रवास होणार सुखकर! पुढील ५ वर्षात ७००+ नव्या लोकल धावणार; गर्दीतून मिळणार कायमची सुटका?
Mumbai Local 700 New Trains : रेल्वे प्रशासनाने पुढील ५ वर्षांत मध्य, पश्चिम रेल्वेवर ७०० हून अधिक नवीन लोकल फेऱ्या सुरू करण्याचा प्लॅन तयार केलाय. या योजनेमुळे कल्याण, डोंबिवली, ठाणे यांसारख्या गर्दीच्या स्थानकांवरील प्रवाशांना मोठा दिलासा मिळणारय.
मुंबईकरांचा प्रवास होणार सुखकर!
मुंबई : मुंबईची जीवनवाहिनी समजल्या जाणाऱ्या लोकल ट्रेनमधील गर्दीने सध्या उच्चांक गाठला आहे. मात्र, आता मुंबईकरांसाठी एक अत्यंत दिलासादायक बातमी समोर आली आहे. पुढील पाच वर्षांत मध्य आणि पश्चिम रेल्वेवर तब्बल ७०० हून अधिक नवीन लोकल फेऱ्या सुरू करण्याचा मास्टर प्लॅन रेल्वे प्रशासनाने तयार केला आहे. रेल्वेच्या या मेगा प्लॅनमुळे प्रवाशांचा रोजचा 'धकाधकीचा प्रवास' काहीसा सुसह्य होण्याची चिन्हे आहेत.
रेल्वेचा नेमका प्लॅन काय?
वाढत्या प्रवासी संख्येचा ताण लक्षात घेता, रेल्वेने झोन स्तरावर कामाला सुरुवात केली आहे. यामध्ये मध्य रेल्वेवर सर्वाधिक भर देण्यात आला आहे.
मध्य रेल्वे: ५४८ नवीन लोकल सेवा.
पश्चिम रेल्वे: १६५ नवीन लोकल सेवा.
विशेषतः कल्याण, डोंबिवली, ठाणे आणि कुर्ला यांसारख्या स्थानकांवरील प्रवाशांची होणारी प्रचंड कोंडी फोडण्यासाठी या जादा फेऱ्यांचा मोठा आधार मिळणार आहे.
रेल्वेमंत्री अश्विनी वैष्णव यांचे व्हिजन
रेल्वेमंत्री अश्विनी वैष्णव यांनी दिलेल्या माहितीनुसार, केवळ गाड्या वाढवून चालणार नाही, तर पायाभूत सुविधाही तितक्याच महत्त्वाच्या आहेत. त्यासाठी
१. कोचिंग टर्मिनल्सचा विस्तार: प्रमुख शहरांमधील टर्मिनल्सची क्षमता वाढवली जाईल.
२. कार्यक्षम वेळापत्रक: गाड्यांच्या वेळेत सुधारणा करून जास्तीत जास्त फेऱ्या कशा चालवता येतील, यावर भर दिला जाईल.
३. झोन स्तरावर सुधारणा: स्थानिक गरजांनुसार अल्पकालीन आणि मध्यम मुदतीचे बदल करून वाहतूक अधिक सुरळीत केली जाईल.
"मुंबईकरांच्या वेळेची बचत आणि सुरक्षित प्रवास हीच आमची प्राथमिकता आहे. आगामी पाच वर्षांत रेल्वे कनेक्टिव्हिटीमध्ये मोठी क्रांती पाहायला मिळेल." — रेल्वे प्रशासन
प्रवाशांना काय फायदा होणार?
पीक अवर्समध्ये (कामाच्या वेळेत) गाड्यांची उपलब्धता वाढणार.
कल्याण-डोंबिवली पट्ट्यातील प्रवाशांना डब्यात चढण्यासाठी करावी लागणारी जीवघेणी कसरत कमी होणार.
नव्याने विकसित होणाऱ्या उपनगरांना मुख्य शहराशी जोडणे सोपे होणार.
