- Home
- Mumbai
- Manoj Jarange Patil : मुंबईच्या वाहतुकीत मोठा बदल, CSMT कडे जाणारे रस्ते बंद, जाणून घ्या कोणते रस्ते राहणार बंद
Manoj Jarange Patil : मुंबईच्या वाहतुकीत मोठा बदल, CSMT कडे जाणारे रस्ते बंद, जाणून घ्या कोणते रस्ते राहणार बंद
मराठा आरक्षणाच्या मागणीसाठी मनोज जरांगे पाटील यांनी मुंबईच्या आझाद मैदानावर सुरू केलेलं उपोषण आज चौथ्या दिवसात पोहोचलं आहे. सरकारकडून अजूनही तोडगा निघालेला नसल्याने त्यांनी आंदोलन अधिक तीव्र करण्याचा निर्णय घेतला आहे.
या पार्श्वभूमीवर सीएसएमटी स्थानक परिसरात वाढलेल्या आंदोलकांच्या गर्दीचा विचार करून मुंबई वाहतूक पोलिसांनी मोठा निर्णय घेतला आहे. सीएसएमटी आणि पालिकेकडे जाणारे सर्व मार्ग आजपासून बंद ठेवण्यात आले आहेत. सुरक्षेच्या दृष्टीने आझाद मैदान, मरीन ड्राईव्ह, पायधुनी आणि वडाळा वाहतूक विभागाला अतिरिक्त पोलिस बंदोबस्तही देण्यात आला आहे.
मराठा आंदोलनाच्या पार्श्वभूमीवर सुरक्षेची कडक व्यवस्था करण्यात आली आहे. वडाळा वाहतूक पोलिसांना ३५ अधिकारी व शिपाई तर आझाद मैदान वाहतूक पोलिसांनाही ३५ अधिकारी व शिपाई अतिरिक्त दिले आहेत. अशा प्रकारे एकूण ७० जणांची विशेष कुमक तैनात करून वाहतुकीवर नियंत्रण ठेवण्याची खबरदारी पोलिस प्रशासनाने घेतली आहे.
मराठा आंदोलनामुळे सीएसएमटी परिसरातील वाहतूक मार्गांमध्ये बदल करण्यात आले आहेत. जे.जे. उड्डाणपुलावरून येणाऱ्या वाहनांना सीएसएमटीऐवजी पोलीस आयुक्तालय, मेट्रो जंक्शन किंवा चर्चगेटकडे वळविण्यात येणार आहे. तसेच मेट्रो जंक्शनहून सीएसएमटीकडे जाणारा मुंबई पालिकेसमोरील मार्ग बंद करण्यात आला आहे. फॅशन स्ट्रीटलगत असलेला हजारीमल सोमानी रोडही वाहतुकीसाठी बंद ठेवण्यात आला आहे. या बदलांमुळे वाहनचालकांना पर्यायी मार्गांचा वापर करण्याचे आवाहन पोलिसांनी केले आहे.
मराठा आंदोलनाच्या पार्श्वभूमीवर वाहतुकीत मोठे बदल करण्यात आले आहेत. हुतात्मा चौकहून सीएसएमटीकडे जाणारा मार्ग बदलण्यात आला असून मंत्रालयासमोरील मॅडम कामा रोड ते मरीन ड्राईव्ह जंक्शन हा रस्ता सुरक्षेच्या कारणास्तव बंद करण्यात आला आहे. दरम्यान, गेल्या दोन दिवसांपासून आंदोलनामुळे बंद असलेला फ्रीवे मात्र उद्यापासून वाहतुकीसाठी पुन्हा खुला करण्यात येणार आहे. वाहनचालकांनी पर्यायी मार्गांचा वापर करून पोलिसांना सहकार्य करण्याचे आवाहन करण्यात आले आहे.
