उद्योगपती हर्ष गोयंका यांनी अन्नभेसळ आणि अस्वच्छ हॉटेल्सवर कारवाई करणाऱ्या आयएएस अधिकारी तुकाराम मुंढे यांचं 'लोकांचा नायक' म्हणत कौतुक केलं. यावर मुंढेंनी अतिशय नम्रपणे उत्तर देत, लोकसेवा ही एका व्यक्तीची नसून संपूर्ण टीमची जबाबदारी असल्याचं म्हटलं आहे.
मुंबई : उद्योगपती हर्ष गोयंका यांनी अन्नभेसळ आणि अस्वच्छ हॉटेल्सवर धडक कारवाई करणाऱ्या आयएएस अधिकारी तुकाराम मुंढे यांचं तोंडभरून कौतुक केलं आहे. त्यांनी मुंढेंना 'लोकांचा नायक' (पीपल्स हिरो) म्हटलंय. पण या कौतुकावर मुंढेंनी दिलेलं नम्र उत्तर सध्या सोशल मीडियावर सर्वांचं लक्ष वेधून घेत आहे.
एका कार्यक्रमात मुंढेंची पहिल्यांदा भेट घेतल्यानंतर गोयंका यांनी 'एक्स' (X) वर आपल्या भावना व्यक्त केल्या. ते म्हणाले की, या कार्यक्रमात मुंढे सर्वांच्या आकर्षणाचे केंद्रबिंदू होते. अन्नभेसळ, अस्वच्छता आणि बड्या आस्थापनांवर त्यांनी केलेल्या कारवाईमुळे अनेक जण त्यांना भेटण्यासाठी उत्सुक होते.
गोयंका यांनी आपल्या पोस्टमध्ये लिहिलंय, "मी तुकाराम मुंढेंना पहिल्यांदाच भेटलो आणि ते खऱ्या अर्थाने त्या संध्याकाळचे 'हिरो' होते. प्रत्येकाला त्यांना भेटायचं होतं. का? कारण नागरिक एका प्रशासकीय अधिकाऱ्याकडून जी अपेक्षा करतात, तेच काम ते करत आहेत. अन्नभेसळ, अस्वच्छ हॉटेल्स आणि बड्या प्रस्थापितांविरुद्ध ते लढत आहेत."
Related Articles
येथे पाहा व्हायरल पोस्ट:
गोयंका यांनी पुढे खंत व्यक्त करत म्हटलं, "एखादा अधिकारी फक्त आपलं काम प्रामाणिकपणे आणि निष्ठेने करतो म्हणून तो लोकांचा नायक बनतो, ही खरंच कौतुकास्पद गोष्ट आहे. पण दुसरीकडे, प्रशासकीय सेवेत अशी उदाहरणे खूप कमी आहेत, हे वास्तव व्यवस्थेचं दुर्दैवी चित्रही समोर आणतं."
या कौतुकाला उत्तर देताना मुंढेंनी स्वतःला श्रेय घेण्याऐवजी लोकसेवेच्या सामूहिक जबाबदारीवर भर दिला. त्यांनी लिहिलं, "लोकसेवा ही कधीच एका व्यक्तीपुरती मर्यादित नसते. नागरिकांची प्रामाणिकपणे, धैर्याने आणि निष्ठेने सेवा करण्याची ती एक सामूहिक बांधिलकी आहे."
इतर अधिकाऱ्यांच्या कामाचं कौतुक करताना ते म्हणाले, "देशभरात असे असंख्य प्रशासकीय अधिकारी आहेत जे अतिशय उत्तम काम करत आहेत, कदाचित माझ्यापेक्षाही चांगलं, पण त्यांच्या प्रयत्नांना क्वचितच योग्य ती दाद मिळते."
आपण एका मोठ्या टीमचा फक्त एक छोटासा भाग असल्याचं सांगत, आतापर्यंत जे काही साध्य झालंय ते सामूहिक प्रयत्नांचं फळ असल्याचं मुंढेंनी स्पष्ट केलं.
आपल्या संदेशाच्या शेवटी त्यांनी एका महत्त्वाच्या गोष्टीवर भर दिला. ते म्हणाले, "नागरिकांचा विश्वास आणि त्यांच्या अपेक्षा ही आमची सर्वात मोठी जबाबदारी आहे. प्रामाणिक, जबाबदार आणि लोकाभिमुख लोकसेवा हा अपवाद नसावा, तर तो नियम असायला हवा."
गोयंका आणि मुंढे यांच्यातील या संवादाचं सोशल मीडियावर खूप कौतुक होत आहे. प्रशासनातील प्रामाणिकपणा आणि कर्तव्य बजावणाऱ्या अधिकाऱ्यांना मिळणाऱ्या संस्थात्मक पाठिंब्याचं महत्त्व नेटकरी अधोरेखित करत आहेत.
