HMPV चा महाराष्ट्रात प्रवेश; नागपुरात आढळले २ रुग्ण

नागपूर: भारतात HMPV व्हायरसचे प्रकरणे वाढून ८ झाली आहेत. मंगळवारी नागपूरमध्ये २ रुग्ण आढळले आहेत. यात एक १३ वर्षांची मुलगी आणि ७ वर्षांचा मुलगा संक्रमित आढळले. दोन्ही मुलांना सतत सर्दी आणि ताप येत होता. त्यानंतर खासगी लॅबमध्ये तपासणीत त्यांचा रिपोर्ट पॉझिटिव्ह आला. मात्र त्यांना रुग्णालयात दाखल करण्याची गरज भासली नाही. उपचारानंतर त्यांची प्रकृती नियंत्रणात आहे.

व्हायरस सामान्य, घाबरण्याची गरज नाही

त्यापूर्वी सोमवारी कर्नाटक आणि तमिळनाडूमध्ये HMPVचे २-२ रुग्ण, पश्चिम बंगाल आणि गुजरातमध्ये प्रत्येकी १ रुग्ण आढळून आले होते. यामुळे व्हायरसची एकूण ६ प्रकरणे नोंदवली गेली होती. यात सर्व संक्रमित मुलं आहेत. देशातील ४ राज्यांमध्ये HMPV चे रुग्ण आढळून आल्यानंतर आरोग्यमंत्री जे.पी. नड्डा यांनी सांगितले की हा व्हायरस सामान्य आहे आणि घाबरण्याची गरज नाही.

गुजरातमधील अहमदाबादमध्ये २ महिन्यांच्या बाळाला तब्येत बिघडल्यामुळे १५ दिवसांपूर्वी रुग्णालयात दाखल करण्यात आले होते. त्या बाळाला सर्दी आणि तीव्र ताप होता. सुरुवातीच्या ५ दिवसांत त्याला व्हेंटिलेटरवर ठेवावे लागले. त्यानंतर करण्यात आलेल्या तपासणीत व्हायरसच्या संसर्गाचा उलगडा झाला.

आणखी वाचा-  महाराष्ट्रात HMPV चे रुग्ण नाहीत, तरीही प्रशासन सतर्क

कर्नाटकातील दोन्ही प्रकरणांबाबत केंद्रीय आरोग्य मंत्रालयाने सांगितले की, संबंधित मुलं रूटीन तपासणीसाठी रुग्णालयात आली होती. चाचणी केल्यावर त्यांचा रिपोर्ट पॉझिटिव्ह आला. मात्र कर्नाटकच्या आरोग्य विभागाने स्पष्ट केले की, मुलांचे नमुने खासगी रुग्णालयात तपासण्यात आले आणि त्यांनी सरकारी लॅबमध्ये तपासणी केली नव्हती.

व्हायरसची लक्षणं कोविडसारखी आहेत. लहान मुलांवर जास्त त्याचा परिणाम होतो. HMPV व्हायरसच्या संसर्गामुळे रुग्णांमध्ये सर्दी आणि कोविड-19 सारखी लक्षणं दिसतात. याचा सर्वाधिक परिणाम लहान मुलांवर होत आहे. विशेषतः 2 वर्षांखालील मुलं या व्हायरसने सर्वाधिक प्रभावित होत आहेत.

HMPV चा संसर्ग टाळण्यासाठी या गोष्टी करा

• खोकताना किंवा शिंकताना तोंड आणि नाक रुमाल किंवा टिशू पेपरने झाका.

• साबण आणि पाणी किंवा अल्कोहोल बेस्ड सॅनिटायझरने वारंवार हात धुवा.

• ताप, खोकला किंवा शिंका असल्यास सार्वजनिक ठिकाणी जाणे टाळा.

• भरपूर पाणी प्या आणि पोषक आहार घ्या.

• संसर्ग टाळण्यासाठी सर्व भागांमध्ये पुरेशी हवेची देवाणघेवाण ठेवा.

आणखी वाचा- पुण्यात HMPV विरोधात कठोर उपाय: नायडू रुग्णालयात बेड राखीव, आरोग्य विभाग अलर्ट!

टाळावयाच्या गोष्टी:

• हस्तांदोलन टाळा.

• टिशू पेपर किंवा रुमाल पुन्हा वापरणे टाळा.

• आजारी व्यक्तींशी जवळचा संपर्क टाळा.

• डोळे, नाक आणि तोंड वारंवार स्पर्श करणे टाळा.

• सार्वजनिक ठिकाणी थुंकणे टाळा.

• डॉक्टरांच्या सल्ल्याशिवाय औषधे घेऊ नका