ढगाळ वातावरणानंतर अखेर पुण्यात दमदार पावसाची एन्ट्री, उकाड्याला ब्रेक, हवेत गारवा!

सार

Image Credit: x

पुणे: गेले काही दिवस ढगाळ वातावरणाची चाहूल लागल्यानंतर अखेर पुण्यात आज पावसाने जोरदार हजेरी लावली आहे. सकाळपासूनच गार वाऱ्यांची झुळूक आणि ढगांनी व्यापलेले आकाश पाहायला मिळाले. काही भागांत ऊनसावल्याचा खेळ सुरू असतानाच अचानक पावसाने सर्वांचं लक्ष वेधून घेतलं.

पावसामुळे शहरात वातावरणात गारवा निर्माण झाला असून नागरिकांना उकाड्यापासून दिलासा मिळाला आहे. अचानक आलेल्या पावसामुळे अनेक प्रवाशांना रस्त्याच्या कडेला थांबून आसरा घ्यावा लागला. दुचाकीस्वारांची विशेष तारांबळ उडाल्याचे चित्र पाहायला मिळाले.

तापमानात लक्षणीय घट

राज्यात बुधवारी व गुरुवारी पडलेल्या मान्सूनपूर्व पावसामुळे कमाल तापमानात तब्बल 8 ते 10 अंश सेल्सिअसची घट झाली आहे. पुण्यासह इतर शहरांमध्ये सुद्धा दिवसभर गार वारे वाहत असल्याने उकाड्याची झळ कमी झाली आहे.

‘यलो अलर्ट’ जारी, या भागांमध्ये पावसाची शक्यता

हवामान विभागाने पुढील काही दिवसांसाठी राज्यातील अनेक जिल्ह्यांमध्ये 'यलो अलर्ट' जाहीर केला आहे:

पुणे: 9 ते 12 मे

धुळे, जळगाव, अहिल्यानगर, कोल्हापूर: 9 ते 12 मे

सातारा: 10 ते 12 मे

छ. संभाजीनगर: 9 ते 11 मे

अकोला, भंडारा: 10 ते 12 मे

बुलडाणा, वाशिम, यवतमाळ: 11 व 12 मे

गडचिरोली, चंद्रपूर: 9 ते 12 मे

गोंदिया: 10 व 11 मे

नागपूर, वर्धा: 9 ते 11 मे

राज्यात 24 तासांत झालेला पाऊस (मी.मी मध्ये):

मुंबई: 18.5

रायगड: 13.5

लोणावळा: 3.5

कर्जत: 2.5

पुणे: गिरीवन (2.5), लवासा (4), तळेगाव (3.5), माळीन (7.5), निमगिरी (10.5)

नाशिक: 18

संपूर्ण राज्यात वातावरणात आलेल्या या बदलामुळे शेतकरी, विद्यार्थी व सर्वसामान्य नागरिकांमध्ये समाधान व्यक्त होत आहे. येत्या काही दिवसांत हवामानात अधिक बदल होण्याची शक्यता असून नागरिकांनी हवामान खात्याच्या सूचनांकडे लक्ष ठेवावे, असा सल्ला देण्यात आला आहे.