Shampoo Ingredients : केस गळती आणि कोंड्यावर कोणता शाम्पू बेस्ट? जाणून घ्या
केस गळायला लागले किंवा कोंडा झाला की तुम्ही लगेच शाम्पू बदलता का? शाम्पूमध्ये भरपूर घटक असले म्हणजे तो चांगला, असा तुमचा समज आहे का? मग निरोगी केसांसाठी शाम्पूमध्ये नेमकं काय असायला हवं?
शाम्पू बदलल्याने खरंच प्रश्न सुटतो का?
केस गळणं, कोंडा, कोरडेपणा किंवा दुभंगलेले केस.. प्रत्येकाची समस्या वेगळी असते. यावर उपाय म्हणून आपण वेगवेगळे शाम्पू वापरतो. पण शाम्पू विकत घेताना तुम्ही त्यातील घटक तपासता का? जास्त घटक असलेला शाम्पू चांगला असतो, असा अनेकांचा गैरसमज असतो. तज्ज्ञांच्या मते, शाम्पूमध्ये किती घटक आहेत यापेक्षा ते घटक तुमची कोणती समस्या दूर करतात, हे पाहणं जास्त महत्त्वाचं आहे.
जास्त घटक असलेला शाम्पू चांगला असतो का?
आजकाल अनेक जण हेअर केअर प्रॉडक्ट्स विकत घेताना त्यावरील लेबल बारकाईने वाचतात. त्यात कोणते घटक आहेत आणि ते केसांसाठी कसे फायदेशीर आहेत, हे त्यांना जाणून घ्यायचं असतं. ही चांगली सवय आहे. पण, शाम्पूमध्ये जेवढे जास्त घटक, तेवढा तो जास्त प्रभावी, असा विचार करणं चुकीचं असल्याचं तज्ज्ञ सांगतात.
समस्येनुसार शाम्पूचे घटक बदलतात
भृंगराज: आयुर्वेदात भृंगराजला खूप महत्त्व आहे. केस मजबूत करण्यासाठी, तुटण्यापासून वाचवण्यासाठी आणि केसांचा पोत सुधारण्यासाठी अनेक उत्पादनांमध्ये याचा वापर करतात. पण केस गळण्याची अनेक कारणं असतात. त्यामुळे फक्त भृंगराज असलेला शाम्पू वापरल्याने केस गळणं थांबेलच, असं नाही.
टी ट्री: डोक्यातील कोंडा आणि खपल्या निघण्याच्या समस्येवर टी ट्री ऑइल फायदेशीर ठरतं. यात क्लिंजिंग आणि अँटी-मायक्रोबियल गुणधर्म असतात. पण कोंड्याचं नेमकं कारण ओळखूनच योग्य प्रॉडक्ट निवडायला हवं.
कंडिशनरमध्ये हे घटक नक्की पाहा
आर्गन ऑइल: तुमचे केस रखरखीत आणि कोरडे झाले असतील, तर आर्गन ऑइल असलेले प्रॉडक्ट्स तुम्हाला नक्कीच मदत करतील. केसांना मऊपणा देण्यासाठी आणि ओलावा टिकवून ठेवण्यासाठी कंडिशनरमध्ये याचा प्रामुख्याने वापर करतात.
शिया बटर: हेअर ड्रायर, स्ट्रेटनरचा सतत वापर केल्याने किंवा केसांना रंग लावल्याने केस कोरडे होऊन खराब होतात. अशा डॅमेज केसांसाठी शिया बटर खूप उपयुक्त ठरतं. हे केसांमधील ओलावा टिकवून त्यांना मऊ आणि चमकदार बनवतं.
शाम्पू विकत घेताना काय काळजी घ्यावी?
शाम्पू विकत घेताना त्यातील घटकांची यादी मोजत बसू नका. सर्वात आधी तुमचे केस आणि टाळूची (स्कॅल्प) नेमकी समस्या काय आहे, ते ओळखा. त्यानंतर त्या समस्येवर उपाय ठरेल असाच शाम्पू निवडा. केस गळती, कोंडा आणि कोरडेपणा या सर्व समस्यांवर एकच शाम्पू काम करेल, असा विचार करू नका. तसेच, नैसर्गिक घटक असलेला शाम्पू सर्वांनाच सूट होईल असं नाही. काहींना ॲलर्जी असू शकते किंवा काहींची त्वचा संवेदनशील असू शकते, या गोष्टीही लक्षात घ्या.
