भारतात आयफोन खरेदी करणाऱ्या ग्राहकांसाठी ॲपलने एक नवीन नियम लागू केला आहे. सणासुदीच्या काळात होणारा काळाबाजार आणि स्टॉकची कमतरता रोखण्यासाठी आता एका ग्राहकाला जास्तीत जास्त दोनच फोन खरेदी करता येणार आहेत. हा नियम आगामी आयफोन ड्युओसह सर्व जुन्या आणि नव्या मॉडेल्सना लागू असेल.
मुंबई : आयफोनची मागणी सध्या खूप वाढली आहे. अशातच ॲपल कंपनीने आपल्या ग्राहकांना एक मोठा धक्का दिला आहे. कंपनीने फोन खरेदीसाठी एक नवीन नियम लागू केला आहे. त्यामुळे आता एकाच वेळी तीन-चार मोबाईल घेण्याच्या ग्राहकांच्या स्वप्नावर पाणी फेरले जाणार आहे.
ॲपलने भारतातील ग्राहकांचे टेन्शन वाढवले आहे. भारतीय बाजारात आयफोन खरेदीवर आता मर्यादा घालण्यात आली आहे. या नव्या नियमानुसार, ग्राहक आता संपूर्ण आयफोन सीरिजमधून जास्तीत जास्त दोनच युनिट्स खरेदी करू शकतात. जर एखाद्याने ऑनलाइन तीन आयफोन खरेदी करण्याचा प्रयत्न केला, तर सिस्टीम ती ऑर्डर स्वीकारणार नाही. म्हणजेच, तुम्ही एकाच वेळी तीन फोन ऑर्डर करू शकणार नाही.
कंपनीच्या नियमांनुसार, ग्राहक एकाच मॉडेलचे दोन आयफोन एकाच वेळी ऑर्डर करू शकतात. किंवा त्यांच्या आवडीचे दोन वेगवेगळे आयफोन मॉडेल्स निवडू शकतात. २३ ऑक्टोबरपासून सुरू होणाऱ्या 'आयफोन ड्युओ'च्या (iPhone Duo) अधिकृत विक्रीपूर्वीच कंपनीने हा नवीन नियम लागू केला आहे. विशेष म्हणजे, आयफोन ड्युओ हा ॲपलचा पहिला फोल्डेबल स्मार्टफोन आहे.
Related Articles
हा नियम का आणला?
सध्या सणासुदीचा काळ सुरू आहे. त्यामुळे साहजिकच फोनला मोठी मागणी आहे. या वाढत्या मागणीनुसार फोनचा पुरवठा करणे कंपनीला कठीण जात आहे. शिवाय, आयफोनच्या या मागणीचा फायदा घेत काही लोक काळाबाजार करून पैसे कमवण्याची शक्यता असते. अचानक निर्माण होणारा स्टॉकचा तुटवडा आणि काळाबाजार रोखण्यासाठी कंपनीने हे पाऊल उचलले आहे. हा नियम फक्त प्रीमियम किंवा नवीन लाँच झालेल्या स्मार्टफोनपुरता मर्यादित नाही, तर दुकानात उपलब्ध असलेल्या जुन्या आणि नव्या अशा सर्वच आयफोन मॉडेल्सना तो लागू आहे.
खरेदीची ही मर्यादा आयफोन ड्युओ, आयफोन १८ प्रो (iPhone 18 Pro) आणि आयफोन १८ प्रो मॅक्स (iPhone 18 Pro Max) यासह सर्व फोनना लागू असेल. ग्राहक आयफोन ड्युओचे दोन युनिट्स ऑर्डर करू शकतात. किंवा आयफोन ड्युओसोबत आयफोन १८ प्रो खरेदी करू शकतात. आयफोन १७ (iPhone 17) सह इतर मॉडेल्सनाही हाच नियम लागू होतो. जर ग्राहकाला तिसरा फोन घ्यायचा असेल, तर ते शक्य होणार नाही. प्रत्येक ग्राहक जास्तीत जास्त दोनच आयफोन खरेदी करू शकतो.
