Rohit Pawar

राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी दुष्काळग्रस्त शेतकऱ्यांना मिळणाऱ्या मदतीवरून सरकारवर टीका केली. कर्जमाफीचा लाभ अद्याप ८० टक्के लोकांना मिळालेला नाही, तर दिवाळीसाठी जाहीर केलेले ५ हजार रुपये ६० टक्के लोकांपर्यंत पोहोचले नसल्याचा दावा त्यांनी केला. हेक्टरी मदत जाहीर न होणे, जनावरांसाठी चारा न मिळणे आणि मायक्रोफायनान्सच्या समस्येवर कारवाई न होण्याकडे त्यांनी लक्ष वेधले. तसेच गोकुळ दूध संघात काँग्रेस विचारांच्या पॅनेलला बहुमत मिळाल्यानंतर सरकारने चार अधिकाऱ्यांना मतदानाचा अधिकार दिल्याचा आरोप त्यांनी केला. हा निर्णय संविधानविरोधी असल्याचे सांगत अधिकाऱ्यांचे अधिकार मागे न घेतल्यास कोल्हापुरातील आंदोलन राज्यभर पसरेल, असा इशारा दिला. सरकारचे लक्ष शेतकऱ्यांऐवजी सत्ता टिकवणे आणि पक्ष फोडण्यावर असल्याची टीकाही त्यांनी केली.