फुकेतहून दिल्लीला येणाऱ्या एअर इंडियाच्या विमानात जोरदार टर्ब्युलन्समुळे काही प्रवासी आणि क्रू सदस्य किरकोळ जखमी झाले.
थायलंडच्या फुकेतहून दिल्लीला येणारं एअर इंडियाचं विमान हवेत जोरदार हेलकावलं. मंगळवारी हवेत असताना अचानक विमान टर्ब्युलन्समध्ये सापडलं, ज्यामुळे ते काही क्षणांसाठी खाली आलं. या घटनेत काही प्रवासी आणि क्रू मेंबर्सना किरकोळ दुखापत झाली आहे. विमान दिल्लीत उतरल्यानंतरचे काही फोटो आणि व्हिडिओ समोर आले आहेत. त्यात टर्मिनल गेटबाहेर रुग्णवाहिका उभ्या असलेल्या दिसतात. काही प्रवाशांना व्हीलचेअरवरून बाहेर आणण्यात आलं, तर काहींच्या डोक्याला बँडेज बांधलेलं होतं. या सर्वांना वैद्यकीय तपासणीसाठी नेण्यात आलं.
एअर इंडियाने घटनेला दुजोरा दिला
एअर इंडियाच्या प्रवक्त्याने एका निवेदनात या घटनेची माहिती दिली. '४ ऑगस्ट रोजी फुकेतहून दिल्लीला येणारी फ्लाईट AI2379 हवेत असताना एका छोट्या टर्ब्युलन्सच्या घटनेला सामोरी गेली. यामुळे विमानाची उंची काही क्षणांसाठी बदलली,' असं एअरलाइनने सांगितलं.
विमान दिल्लीत सुरक्षितपणे उतरलं असून सर्व प्रवासी आणि क्रू सदस्य सुखरूप बाहेर आले. 'सध्या तरी कोणालाही गंभीर दुखापत झालेली नाही. ज्या काही प्रवाशांना आणि क्रू मेंबर्सना किरकोळ जखमा झाल्या आहेत, त्यांना खबरदारी म्हणून विमानतळावरील वैद्यकीय सुविधेत तपासणीसाठी नेण्यात आलं आहे,' असंही प्रवक्त्याने स्पष्ट केलं.
Related Articles
प्रवाशाने सांगितला थरारक अनुभव
विमान उतरल्यानंतर एका प्रवाशाने ANI वृत्तसंस्थेशी बोलताना हा अनुभव सांगितला. तो म्हणाला, 'टर्ब्युलन्स अचानक आणि खूप जोरदार होता. विमान हवेत उडून साधारण दीड तास झाला होता. पहाटेची वेळ असल्यामुळे आम्ही सगळे झोपेत होतो. अचानक विमान एका बाजूला झुकलं आणि पुढची दोन-तीन मिनिटं तसंच हेलकावे खात राहिलं.'
या घटनेत अनेक जण जखमी झाल्याचा दावा या प्रवाशाने केला. 'जवळपास १५ ते २० प्रवासी जखमी झाले आहेत. कुणाच्या तरी बाळाला लागलं आहे. माझ्या कमरेला दुखापत झाली. माझ्या भावाच्या खांद्याला आणि पाठीला मार लागला आहे. आता मेडिकल रिपोर्ट आल्यावरच नक्की काय झालंय ते कळेल,' असंही तो प्रवासी म्हणाला.
एअर इंडियाकडून मदतीचं आश्वासन
एअर इंडियाने आपल्या निवेदनात पुढे म्हटलं आहे की, प्रवासी आणि क्रू सदस्यांची सुरक्षा हीच आमची सर्वोच्च प्राथमिकता आहे. आम्ही जखमींना सर्व आवश्यक मदत करत आहोत. 'या घटनेच्या तपासात आम्ही संबंधित अधिकाऱ्यांना पूर्ण सहकार्य करत आहोत,' असं एअरलाइनने स्पष्ट केलं. (ANI)
(ही बातमी हेडलाईन वगळता Asianet Newsable च्या टीमने संपादित केलेली नाही. ती थेट सिंडिकेट फीडवरून प्रकाशित करण्यात आली आहे.)
