मणिपूरमध्ये पुन्हा हिंसाचार, १०,८०० अतिरिक्त सैनिक तैनात

इंफाळ: मणिपूरमध्ये वाढत्या जातीय हिंसाचाराच्या पार्श्वभूमीवर केंद्र सरकारने १०,८०० अतिरिक्त सैनिक तैनात करण्यास मान्यता दिली आहे, अशी माहिती मणिपूरचे मुख्य सुरक्षा सल्लागार कुलदीप सिंग यांनी दिली.

अलिकडेच केंद्रीय गृहमंत्री अमित शाह यांच्या अध्यक्षतेखाली झालेल्या बैठकीत ५,००० अतिरिक्त केंद्रीय सैनिक पाठवण्याचा निर्णय घेण्यात आला होता, असे सूत्रांनी सांगितले. मात्र, ५,००० ऐवजी १०,८०० सैनिक तैनात करण्याचा निर्णय केंद्राने घेतला आहे.

‘राज्याची राजधानी इंफाळमध्ये आधीच अनेक तुकड्या पोहोचल्या आहेत. उर्वरित सैनिक लवकरच राज्यात तैनात केले जातील,’ असे सिंग म्हणाले. दरम्यान, गेल्या दीड वर्षापासून सुरू असलेल्या हिंसाचारात आतापर्यंत २५८ जणांचा मृत्यू झाला आहे, असेही त्यांनी सांगितले.

 मंत्र्यांकडूनच मुख्यमंत्री बिरेन यांच्या राजीनाम्याची मागणी! 

जातीय संघर्षामुळे त्रस्त असलेल्या मणिपूरमध्ये आता राजकीय संकटही निर्माण झाले आहे. स्वतः एका मंत्र्याने मुख्यमंत्री बिरेन सिंग यांच्या राजीनाम्याची मागणी केली आहे.

‘गेल्या १८ महिन्यांपासून राज्यातील कायदा आणि सुव्यवस्था बिघडली आहे. शांतता प्रस्थापित करण्यात अपयशी ठरल्यानंतर मुख्यमंत्री बिरेन राजीनामा का देत नाहीत?’ असा सवाल राज्याचे नगरपालिका प्रशासन, गृहनिर्माण आणि नगरविकास मंत्री युमनाम खेंचंद सिंग यांनी उपस्थित केला आहे. सोमवारी मुख्यमंत्री बिरेन यांनी बोलावलेल्या एनडीए आमदारांच्या बैठकीला गैरहजर राहिलेल्या १९ जणांपैकी युमनाम हे एक होते.

मंत्र्यांच्या घराभोवती सुरक्षा कुंपण: पूर्व इंफाळमधील खुराई येथील आपल्या पूर्वजांच्या घराचे हल्लेखोरांपासून रक्षण करण्यासाठी मंत्री सुसिंदो मैतेई यांनी आपल्या घराभोवती काटेरी तारांचे कुंपण आणि लोखंडी जाळी बसवली आहे. १६ नोव्हेंबर रोजी झालेल्या हल्ल्यासह तीन वेळा आपल्या निवासस्थानी हल्ला झाल्याने हे पाऊल उचलल्याचे सुसिंदो यांनी सांगितले.

७ हल्लेखोर अटकेत: १६ नोव्हेंबर रोजी मणिपूरमधील काही मंत्री आणि आमदारांच्या निवासस्थानांवर हल्ला करून मालमत्तेचे नुकसान केल्याप्रकरणी मणिपूर पोलिसांनी ७ जणांना अटक केली आहे.

काँग्रेसचे अपयश: नड्डा यांचा हल्ला

मणिपूरमधील संघर्ष नियंत्रित करण्यात केंद्र सरकार अपयशी ठरले आहे, असा आरोप करत राष्ट्रपतींच्या मध्यस्थीची मागणी करणाऱ्या काँग्रेस अध्यक्ष मल्लिकार्जुन खर्गे यांच्यावर भाजप अध्यक्ष जे. पी. नड्डा यांनी जोरदार हल्ला चढवला आहे. ‘मणिपूरमधील स्थानिक समस्या सोडवण्यात मागील काँग्रेस सरकारचे अपयश हेच आजच्या परिस्थितीला कारणीभूत आहे,’ असे ते म्हणाले.

‘काँग्रेसच्या सत्तेच्या काळात मणिपूरमधील स्थानिक समस्या सोडवण्यात अपयशी ठरल्यामुळे आज राज्य त्याचे परिणाम भोगत आहे. पी. चिदंबरम गृहमंत्री असताना भारतात परदेशी दहशतवाद्यांच्या बेकायदेशीर स्थलांतराला कायदेशीर मान्यता देण्यात आली, त्यांना आश्रय देण्यात आला आणि त्यांच्याशी करारही करण्यात आला. त्याचेच हे फलित आहे,’ असा आरोप नड्डा यांनी केला.