अकबरने जोधाशी नव्हे तर दासीच्या मुलीसोबत रचला होता विवाह, राज्यपाल हरिभाऊ बागडेंचा दावा

जोधा आणि अकबरची प्रेमकहाणी जगप्रसिद्ध आहे. लहान मुलांपासून ते वृद्धांपर्यंत ही कथा सर्वांनाच माहिती आहे. पण आता या कथेला एक नवा ट्विस्ट मिळाला आहे.

जयपूर- आमेरची राजकुमारी जोधा आणि मुघल सम्राट अकबर यांची प्रेमकहाणी खूप प्रसिद्ध आहे. इतिहासाच्या पानांवर आपण त्यांची प्रेमकहाणी वाचू शकतो. ही प्रेमकहाणी पुस्तक आणि चित्रपटांच्या रूपातही प्रसिद्ध झाली आहे. मालिकांच्या माध्यमातून घरोघरी पोहोचली आहे. पण आतापर्यंत आपण जी प्रेमकहाणी ऐकत आलो आहोत ती खोटी असल्याचा दावा करण्यात येत आहे, ज्यामुळे सर्वत्र चर्चा सुरू झाली आहे.

राजस्थानचे राज्यपाल आणि महाराष्ट्र विधानसभेचे माजी सभापती हरीभाऊ बागडे यांनी जोधा आणि अकबरची प्रेमकहाणी खोटी असल्याचे म्हटले आहे. इतिहासात नोंद असलेल्या जोधा आणि अकबरच्या विवाहाबाबत त्यांनी नवीन वाद निर्माण केला आहे. एका कार्यक्रमात बोलताना हरीभाऊ म्हणाले की, ही कथा खोटी आहे. जोधा आणि अकबरचा विवाह ऐतिहासिक नाही. ब्रिटिश इतिहासकारांच्या प्रभावामुळे भारतीय इतिहासात ही खोटी कथा नोंदवली गेली आहे.

जोधा आणि अकबरचे लग्न झाले असे म्हटले जाते. यावर चित्रपटही बनला आहे. पण ही कथा खोटी आहे. अकबरनामात या विवाहाचा कुठेही उल्लेख नाही. आमेरचा राजा भारमलने अकबरसोबत राजकुमारी जोधाचा नव्हे तर आपल्या दासीच्या मुलीचा विवाह लावला होता, असे राज्यपाल बागडे यांनी म्हटले आहे. ब्रिटिश लेखनावर प्रश्नचिन्ह उपस्थित करत ते म्हणाले की, वसाहतवादी इतिहासकारांच्या प्रभावामुळे भारतीय इतिहासातील अनेक गोष्टी विकृत करण्यात आल्या आहेत. खोट्या कथांचा प्रचार करण्यात आला आहे.

ब्रिटिशांनी भारतीय योद्ध्यांचा इतिहास विकृत केला आणि त्यांनी लिहिलेला इतिहास बराच काळ खरा मानला गेला, असे राज्यपाल हरीभाऊ बागडे यांनी म्हटले आहे. इतिहास लिहिणारे भारतीयही ब्रिटिश दृष्टिकोनाने प्रभावित झाले होते, असा आरोप हरीभाऊ यांनी केला आहे.

मुघल सम्राट अकबर आणि राजपूत नेते महाराणा प्रताप यांच्याशी संबंधित ऐतिहासिक घटनांचा उल्लेख करताना राज्यपाल बागडे म्हणाले की, महाराणा प्रतापने अकबरला तडजोडीचा प्रस्ताव पाठवला होता, हे विधान पूर्णपणे दिशाभूल करणारे आहे. महाराणा प्रतापने कधीही आपल्या स्वाभिमानाशी तडजोड केली नाही. इतिहासात अकबरबद्दल खूप काही सांगितले जाते, पण महाराणा प्रतापबद्दल फारच कमी माहिती मिळते, हे दुःखाचे आणि दुर्दैवाचे आहे, असे हरीभाऊ म्हणाले.

१५६९ मध्ये मुघल सम्राट अकबर आणि आमेरच्या राजा भारमल यांच्या मुलीच्या ऐतिहासिक विवाहाबाबत पुन्हा चर्चा सुरू झाली आहे. आता जयपूरजवळ असलेले आमेर हे कछवाहा राजपूतांची राजधानी होते. नंतर सवाई जयसिंग दुसऱ्याने १७२७ मध्ये राजधानी जयपूरला हलवली. हरीभाऊ यांनी छत्रपती शिवाजी महाराज आणि महाराणा प्रताप यांना देशभक्ती आणि शौर्याचे प्रतीक म्हणून वर्णन केले. जर हे दोही महान योद्धे एकाच काळात असते तर भारताचा इतिहास पूर्णपणे वेगळा असता, असे राज्यपाल म्हणाले. त्यांच्या जन्मात ९० वर्षांचे अंतर होते, पण दोन्हीही देशभक्ती आणि शौर्याचे प्रतीक मानले जातात, असे ते म्हणाले.