प्रेमकथेचा दुर्दैवी अंत: प्रियकराने प्रेयसीची हत्या करून पलायन

बेंगळुरु: सिलिकॉन सिटी बेंगळुरुत नोकरीच्या शोधात आलेल्या केरळच्या तरुणा आणि आसामच्या तरुणीचे एका खाजगी कंपनीत काम करत असताना प्रेमसंबंध जुळले. मात्र, दोघेही एकत्र राहत असलेल्या अपार्टमेंटमध्ये तरुणानेच आपल्या प्रेयसीची हत्या करून पलायन केल्याची घटना घडली आहे.

बेंगळुरूच्या इंदिरानगरमधील रॉयल लिव्हिंग अपार्टमेंटमध्ये ही घटना घडली आहे. ही घटना तीन दिवसांपूर्वीच घडली असून, उशिराने उघडकीस आली आहे. हत्या झालेली तरुणी माया आसामची रहिवासी होती. तर हत्येचा आरोपी आरव अनॉय हा केरळचा रहिवासी आहे. दोघेही बेंगळुरूच्या एका खाजगी कंपनीत काम करत होते. यावेळी दोघांची ओळख झाली आणि मैत्री झाली. काही दिवसांतच त्यांच्यात प्रेमसंबंध निर्माण झाले. त्यानंतर, दोघेही आपापली घरे सोडून बेंगळुरुत एकत्र राहू लागले आणि शहरात विविध ठिकाणी फिरले.

चार-पाच दिवसांपूर्वी ते इंदिरानगरमधील द रॉयल लिव्हिंग या अपार्टमेंटमध्ये एकत्र राहत होते. मात्र, तीन दिवसांपूर्वी दोघांमध्ये वाद झाला. त्यावेळी प्रियकर आरवने प्रेयसी मायाला चाकूने भोसकून हत्या केली आणि पलायन केले. ही हत्या झाल्यानंतर तीन दिवसांनी घरातून दुर्गंधी येऊ लागल्याने शेजारच्यांनी पोलिसांना माहिती दिली. इंदिरानगर पोलीस घटनास्थळी पोहोचले आणि तपास केला असता, चाकूने भोसकून हत्या केल्याचे उघड झाले. पोलिसांनी घटनास्थळाची पाहणी केली आणि मृतदेह शवविच्छेदनासाठी रुग्णालयात पाठवला.

मायाचा मृतदेह तुकडे करण्याचा प्रयत्न: माया गोगोई हत्या प्रकरणी नोव्हेंबर २३ रोजी दुपारी सर्व्हिस अपार्टमेंटमध्ये आरोपी आला होता. माया गोगोई आणि आरव्ह हॉर्नी दोघेही एकत्र आल्याचे सीसीटीव्हीत दिसून आले आहे. २४ तारखेलाच मायाची हत्या झाल्याचा संशय आहे. हत्येनंतर तो त्याच खोलीत राहिला. तिथेच बसून सिगारेट ओढली. मृतदेहाजवळच वेळ घालवला. आज सकाळी कॅब बुक करून तो निघून गेला. मृतदेह तुकडे करण्याचा त्याचा विचार होता का? शेवटी त्याचा बेत फसला आणि तो मृतदेह सोडून पळून गेला असा पोलिसांना संशय आहे.