कोणत्याही इमारतीवरून उडी मारू शकतो असा दावा या विद्यार्थ्याने आपल्या सहकाऱ्यांना केला होता. त्यानंतर त्याने हॉस्टेलच्या चौथ्या मजल्यावरून उडी मारली.
कोयंबतूर: अद्भुत शक्ती असल्याचा दावा करत कॉलेज हॉस्टेलच्या चौथ्या मजल्यावरून उडी मारणाऱ्या विद्यार्थ्याला गंभीर दुखापत झाली. सोमवारी संध्याकाळी कोयंबतूरजवळील मायलेरीपाळयम येथील खाजगी अभियांत्रिकी महाविद्यालयात ही घटना घडली. खाली पडून गंभीर जखमी झालेल्या तिसऱ्या वर्षाच्या अभियांत्रिकी विद्यार्थी, इरोड येथील रहिवासी प्रभू (१९) याला रुग्णालयात दाखल करण्यात आले आहे.
हॉस्टेलच्या चौथ्या मजल्यावरून उडी मारल्याने प्रभूचे पाय आणि हात तुटले. त्याच्या डोक्यालाही गंभीर दुखापत झाली आहे. त्याने आपल्या सहकाऱ्यांना अद्भुत शक्ती असल्याचे सांगितले होते, अशी माहिती समोर येत आहे. इरोड जिल्ह्यातील पेरुंथुरायजवळील मेकूर येथील रहिवासी प्रभू हा बीटेक (कृत्रिम बुद्धिमत्ता आणि डेटा सायन्स) तिसऱ्या वर्षाचा विद्यार्थी आहे. तो कॉलेज हॉस्टेलमध्ये राहत होता.
कोणत्याही इमारतीवरून उडी मारू शकतो, असा दावा प्रभूने आपल्या सहकाऱ्यांना केला होता. त्यानंतर त्याने चौथ्या मजल्यावरून उडी मारली. प्रभू इमारतीवरून उडी मारतानाचे सीसीटीव्ही फुटेज मिळाले आहे. गेल्या आठवड्यात तो जादूटोण्याच्या प्रभावाखाली होता, असे त्याने आपल्या मित्रांना आणि रूममेट्सना सांगितले होते, असे पोलिसांना कळाले आहे. त्याने स्वतःला महाशक्ती असल्याचेही सांगितले होते, असे पोलिसांनी म्हटले आहे.
