सुईविरहित इंजेक्शन: आयआयटी बॉम्बेचा शोध

मुंबई: सुईविरहित इंजेक्शनचा शोध आयआयटी बॉम्बेने लावला आहे. सुई न वापरता औषध शरीरात पोहोचवण्यासाठी 'शॉक इंजेक्शन' विकसित केले आहे. त्वचेला इजा न करता किंवा संसर्ग न होता औषध देणे ही त्याची खासियत आहे. एरोस्पेस अभियांत्रिकीच्या तत्त्वांवर आधारित हे इंजेक्शन विकसित केल्याचे संशोधनाचे प्रमुख विरन मेनासेस यांनी सांगितले. जर्नल ऑफ बायोमेडिकल मटेरियल्स अँड डिव्हाइसमध्ये हे संशोधन प्रकाशित झाले आहे. उंदरांवरील प्रयोग यशस्वी झाले असून, मानवांवरील चाचण्यांनंतर आवश्यक ते बदल केले जातील, असे संशोधन पथकाने म्हटले आहे.

सुया असलेल्या इंजेक्शनपेक्षा वेगळे, शॉक इंजेक्शन त्वचेमध्ये आवाजाच्या वेगापेक्षा जास्त वेगाने प्रवास करणारे उच्च-ऊर्जा दाब लहरी (शॉक वेव्ह्ज) वापरते. शरीरावर केसाच्या जाडीएवढीच जखम होते. २०२१ मध्ये प्रा. मेनासेस यांच्या प्रयोगशाळेत विकसित केलेले शॉक इंजेक्शन सामान्य बॉलपेनपेक्षा थोडेच लांब आहे.

इंजेक्शनमध्ये दाबयुक्त नायट्रोजन वायू वापरला जातो. रुग्णांना औषध शरीरात गेल्याचे जाणवतही नाही, असा दावा आहे. किंमत, औषध वितरण यांसारख्या घटकांवर शॉक इंजेक्शनचा वैद्यकीय वापर अवलंबून असेल.