Maharashtra Rain Update : कोकणात पावसाचा जोर काहीसा ओसरला; पण मुंबई, ठाणे, पालघर आणि रायगडमध्ये पुन्हा मुसळधार पावसाचा इशारा

मुंबई : कोकणात पावसाचा जोर ओसरला आहे. पण मुंबई, ठाणे या भागात पावासाच्या सरी कोसळणार असल्याचा अंदाज हवामान खात्याने व्यक्त केला आहे. पालघर जिल्ह्यात दुपारनंतर पावसाचा अंदाज आहे. 

कोकणातील पावसाचा अंदाज

गेल्या काही दिवसांपासून कोकणात मुसळधार पावसाने जोर धरला होता, मात्र आता पावसाचा तीव्रपणा काहीसा कमी झाला आहे. शुक्रवारी काही भागांत जोरदार सरी कोसळल्या, ज्यामुळे रस्ते पाण्याखाली गेले आणि वाहतूक व्यवस्थेवर परिणाम झाला. हवामान खात्याच्या अंदाजानुसार, आज 12 जुलै रोजी कोकणात पुन्हा हलक्या ते मध्यम स्वरूपाच्या सरींचे सत्र सुरु राहणार आहे.

मुंबईत सकाळपासून ढगाळ वातावरण, दुपारनंतर सरींची शक्यता

मुंबईत आज सकाळपासून आकाश ढगाळ असून काही भागांत मध्यम स्वरूपाच्या सरी पडत आहेत. हवामान खात्याने दुपारनंतर हलका ते मध्यम पाऊस पडण्याचा अंदाज वर्तवला आहे. विशेषतः दादर, सायन, अंधेरी, घाटकोपर परिसरात पाणी साचण्याची शक्यता आहे. वाऱ्याचा वेग 20–30 किमी प्रतितास असण्याचा अंदाज आहे, त्यामुळे समुद्रकिनाऱ्याजवळ जाणाऱ्यांनी खबरदारी घेणे आवश्यक आहे. सकाळचे तापमान सुमारे 27°C असून दुपारी 31°C पर्यंत जाण्याची शक्यता आहे.

दुपारनंतर पावसाचा जोर वाढणार

ठाणे आणि नवी मुंबई परिसरात सकाळपासून रिमझिम पावसाने हजेरी लावली आहे. बेलापूर, वाशी, ठाणे स्टेशन परिसर, आणि घोडबंदर रोड या भागांमध्ये दुपारनंतर पावसाचा जोर वाढण्याची शक्यता हवामान विभागाने वर्तवली आहे.

पालघर जिल्ह्यात वाऱ्याचा वेग वाढण्याची शक्यता

पालघर जिल्ह्यात सकाळी हलक्या सरी आणि ढगाळ वातावरण होते. जव्हार, वसई, विरार, डहाणू परिसरात दुपारी जोरदार पावसाचा अंदाज आहे. जिल्ह्याच्या पश्चिम किनारपट्टीवर वाऱ्याचा वेग वाढू शकतो, त्यामुळे मच्छीमार बांधवांना समुद्रात जाण्यावर बंदी घालण्यात आली आहे.

रत्नागिरी, रायगड व सिंधुदुर्गमध्ये पावसाचा इशारा कायम

रत्नागिरी आणि रायगड जिल्ह्यांत आजही मध्यम ते जोरदार पावसाची शक्यता वर्तवण्यात आली आहे. काही सखल भागांमध्ये पाणी साचण्याची शक्यता असल्याने स्थानिक प्रशासनाकडून सतर्कतेचा इशारा देण्यात आला आहे. सिंधुदुर्गमध्ये विजांच्या कडकडाटासह सायंकाळपर्यंत जोरदार सरींचा अंदाज असून, पर्यटन स्थळे आणि समुद्रकिनाऱ्यांपासून दूर राहण्याचे आवाहन करण्यात आले आहे. विशेषतः रायगडमधील महाड आणि पोलादपूर येथे पावसाचा तीव्र जोर अपेक्षित आहे.