Pune Traffic Update : पुणे महापालिका निवडणूक: १५ जानेवारीला मतदान; शहरातील वाहतुकीत मोठे बदल, कडक सुरक्षा व्यवस्था

Pune Traffic Update : पुणे महापालिकेच्या मतदानासाठी १५ जानेवारी रोजी शहरातील अनेक प्रमुख रस्त्यांवर सकाळी ६ ते सायंकाळी ७ दरम्यान वाहतूक निर्बंध लागू असतील. 

Pune Traffic Update : राज्यात महापालिका निवडणुकांची धामधूम सुरू असताना पुणे महानगरपालिकेच्या रिक्त जागांसाठी येत्या १५ जानेवारी रोजी मतदान प्रक्रिया पार पडणार आहे. शहरातील विविध मतदान केंद्रांवर नागरिक आपला मतदानाचा हक्क बजावणार असून, मतदान शांततेत आणि सुरळीत पार पडावे यासाठी प्रशासनाने सर्व तयारी पूर्ण केली आहे. संभाव्य गर्दी आणि सुरक्षिततेच्या कारणास्तव पुणे शहरातील वाहतूक व्यवस्थेत मोठे बदल करण्यात आले आहेत.

मतदानाच्या दिवशी विशेष वाहतूक नियमावली

मतदानाच्या पार्श्वभूमीवर पुणे वाहतूक पोलिसांनी विशेष नियमावली जाहीर केली आहे. सकाळी ६ ते सायंकाळी ७ या वेळेत शहरातील अनेक प्रमुख रस्ते वाहतुकीसाठी बंद राहणार आहेत. विशेषतः जड वाहने आणि खाजगी वाहनांना काही भागांमध्ये प्रवेशबंदी लागू करण्यात आली आहे. हे बदल पुणे शहरातील सहा प्रमुख वाहतूक विभागांतर्गत लागू असतील.

हडपसर परिसरात वाहतुकीत बदल

हडपसर भागात मतदान केंद्रांची संख्या अधिक असल्याने येथे मोठी गर्दी होण्याची शक्यता आहे. 

• बंद मार्ग: साने गुरुजी परिसराकडे जाणारा मुख्य रस्ता पूर्णपणे बंद राहील. 
• पर्यायी मार्ग:  वाहनचालकांनी हडपसर वेस्ट अमरधाम स्मशानभूमी मार्ग, माळवाडी डी.पी. रस्ता किंवा हडपसर गाडीतळ–संजीवनी हॉस्पिटल डी.पी. रस्त्याचा वापर करावा.

कोरेगाव पार्क परिसरात निर्बंध

व्हीआयपी हालचाली आणि संवेदनशील मतदान केंद्रांमुळे कोरेगाव पार्क परिसरातील अंतर्गत रस्त्यांवर कडक निर्बंध असतील. 

• बंद मार्ग: नॉर्थ मेन रोड (लेन ‘सी’) ते पाणीपुरवठा केंद्र, बंडगार्डन घाट तसेच महात्मा गांधी चौक ते मौलाना अब्दुल कलाम आझाद स्मारक. 
• पर्यायी मार्ग: कोरेगाव पार्क जंक्शन ते एबीसी फार्म हा मुख्य मार्ग खुला राहणार आहे.

समर्थ वाहतूक विभागात मोठे फेरबदल

पुणे स्टेशन व मध्यवर्ती पेठांना जोडणाऱ्या समर्थ विभागात विशेष वाहतूक बदल लागू करण्यात आले आहेत. 

• बंद मार्ग:  पॉवर हाऊस चौक ते बालाजी चौक, संत कबीर चौक ते क्वार्टर गेट चौक आणि रामोशी गेट ते जुना मोठा स्टँड. 
• पर्यायी मार्ग:  शांताई हॉटेल, बाहुबली चौक, क्वार्टर गेट चौक आणि सेव्हन लव्हज चौक मार्गे वाहतूक वळवण्यात येईल.

विमानतळ परिसरातील वाहतूक बदल

• बंद मार्ग:  फिनिक्स मॉल मागील रस्ता, सॉलिटेअर इमारत आणि निको गार्डन परिसरातील अंतर्गत रस्ते बंद राहतील. 
• पर्यायी मार्ग:  विमान नगर चौक, श्रीकृष्ण हॉटेल चौक आणि दत्त मंदिर चौकमार्गे वाहतूक सुरू राहील.

विश्रामबाग व दत्तवाडी विभागात निर्बंध

• विश्रामबाग:  पुरम चौक ते टिळक चौक दरम्यान वाहतूक बंद राहील; नागरिकांनी शास्त्री रस्ता–दांडेकर पूल मार्ग वापरावा. 
• दत्तवाडी:  सनस पुतळा ते ना. सी. फडके चौक आणि सारसबाग खाऊ गल्ली मार्ग बंद राहील. वाहतूक एबीसी चौक आणि पुरम चौकमार्गे वळवण्यात येईल.