पुण्यात अजित पवार यांचा पक्ष लागला तयारीला, दोघांची शहराध्यक्ष पदावर केली निवड
सार
अजित पवार गटाने पुण्यात संघटनात्मक पुनर्रचना करत पश्चिम पुण्याची जबाबदारी सुनील टिंगरे आणि पूर्व पुण्याची सुभाष जगताप यांच्यावर सोपवली आहे.
पुणे | प्रतिनिधी राजकीय रणभूमीवर पुनरागमन केल्यानंतर राष्ट्रवादी काँग्रेस (अजित पवार गट)ने पुण्यात संघटनात्मक पुनर्रचना करत, पश्चिम पुण्याची जबाबदारी सुनील टिंगरे आणि पूर्व पुण्याची सुभाष जगताप यांच्यावर सोपवली आहे. या बदलामुळे केवळ नेतृत्वात नावीन्यपणा आला नाही, तर पुण्यात आगामी स्थानिक निवडणुकांसाठी राष्ट्रवादीने ‘डबल इंजिन’ मोडमध्ये तयारी सुरू केल्याचे स्पष्ट होत आहे.
या नव्या नियुक्त्यांमधून राष्ट्रवादीने स्पष्ट संदेश दिला आहे – पक्ष आता विभागीय आणि बूथ पातळीवर लढाई लढण्याच्या तयारीत आहे. पूर्व आणि पश्चिम पुणे या दोन भिन्न राजकीय आणि सामाजिक वास्तवांमध्ये समन्वय साधण्यासाठी दोन स्वतंत्र शहराध्यक्ष नेमण्याचा निर्णय, ही केवळ संघटनात्मक नवी मांडणी नसून मूळ उद्दिष्ट ‘लोकलायझेशन’चं सशक्तीकरण आहे.
सुनील टिंगरे हे जुने, अनुभवी, जमीनीवरचे कार्यकर्ते म्हणून ओळखले जातात. तर सुभाष जगताप हे संघटन कौशल्य आणि कार्यकर्त्यांमधील स्वीकारार्हतेमुळे महत्त्वाचे मानले जातात. दोघांनाही दिलेल्या जबाबदाऱ्यांतून राष्ट्रवादीने कार्यकर्त्यांमध्ये नवीन ऊर्जा निर्माण करण्याचा प्रयत्न केला आहे.
पुण्यातील आगामी महापालिका निवडणूक, विधानपरिषद आणि विधानसभेच्या पार्श्वभूमीवर या नेमणुका ‘शहराध्यक्ष’ या पदापुरत्या मर्यादित राहणार नाहीत. टिंगरे आणि जगताप हे पक्षाचे ‘ग्राउंड कमांडर’ म्हणून भूमिका बजावणार, अशी चर्चा पक्षांतर्गत सूत्रांकडून समोर येत आहे.
या नियुक्तींनंतर राष्ट्रवादी काँग्रेसने विरोधकांना अप्रत्यक्ष टोला लगावत, संघटनात्मक ताकदीचा दावा केला आहे. "इतर पक्ष जिथं गटबाजीने खिळखिळे होत आहेत, तिथं आम्ही जिल्हावार नव्हे, आता उपनगरवार आखणी करत आहोत," असा विश्वास राष्ट्रवादीच्या वरिष्ठ नेत्यांनी व्यक्त केला.