Amul Price Hike: सणासुदीच्या आधीच सर्वसामान्यांना झटका! अमूलने वाढवले तूप आणि बटरचे दर

सणासुदीचा काळ सुरू होण्यापूर्वीच अमूलने तूप आणि बटरच्या दरात अनुक्रमे ५० आणि १५ रुपयांची वाढ केली आहे. बाजारात बनावट तुपावर होणारी कारवाई आणि दिवाळीमुळे वाढलेली मागणी हे या दरवाढीचे मुख्य कारण आहे.

Amul Price Hike: सणासुदीच्या आधीच सर्वसामान्यांच्या खिशाला कात्री लागली आहे! येत्या काळात लोकांच्या बजेटवर आणखी ताण पडणार आहे. अमूलने तुपाच्या दरात ५० रुपये आणि बटरच्या दरात १५ रुपयांची वाढ केली आहे. सणांच्या दिवसांत ही दरवाढ लोकांच्या खिशाला चांगलीच जड जाऊ शकते.

सणासुदीचा काळ असल्यामुळे सध्या तूप आणि बटरची मागणी खूप वाढली आहे. यामुळेच ही दरवाढ झाली आहे. याशिवाय, बनावट तुपावर सुरू असलेल्या कारवाईमुळेही चांगल्या ब्रँडची मागणी वाढली आहे, जे या दरवाढीमागचं एक महत्त्वाचं कारण आहे.

दर किती वाढले?

अमूल तुपाचा दर ५० रुपयांनी तर बटरचा दर १५ रुपयांनी वाढवण्यात आला आहे. यामुळे, १ किलो अमूल तुपाच्या पॅकेटची किंमत आता ६८० रुपये झाली आहे, जी आधी ६३० रुपये होती. ५०० ग्रॅम बटरच्या पॅकेटचा नवीन दर ३२५ रुपये झाला आहे, जो आधी ३१० रुपये होता. तूप आणि बटरचे नवीन दर खालीलप्रमाणे आहेत:

प्रॉडक्ट - जुना दर - नवीन दर

१ किलो तूप कार्टन - ६३० रुपये - ६८० रुपये

५०० ग्रॅम शुद्ध तूप - ३२५ रुपये - ३४५ रुपये

१०० ग्रॅम बटर - ६३ रुपये - ६६ रुपये

५०० ग्रॅम बटर - ३१० रुपये - ३२५ रुपये

अमूलने दर का वाढवले?

काही दिवसांवरच दिवाळी आली आहे, त्यामुळे बाजारात तुपाची मागणी वाढली आहे. बटरची मागणीही दिवसेंदिवस वाढत आहे. परिणामी, कंपनीने तूप आणि बटरचे दर वाढवले आहेत. वाढत्या मागणीच्या तुलनेत बाजारात पुरवठ्याची कमतरता होती. दुसरीकडे, जास्त मागणीमुळे तुपाचा काळाबाजारही वाढू लागला होता. या गोष्टी उघडकीस आल्यानंतर आता लोकांचा कल ब्रँडेड उत्पादनांकडे वाढला आहे.

सणासुदीच्या काळात सगळेच जण चांगला ब्रँड शोधतात. यामुळे कंपनीला चांगला महसूल मिळवण्याची संधी मिळते. अमूल ही फक्त देशातच नाही, तर जगभरात दुग्धजन्य पदार्थांची निर्मिती करणारी एक मोठी कंपनी आहे. लोकांचा या कंपनीवर वर्षानुवर्षे विश्वास आहे. त्यामुळे भेसळयुक्त तूप आणि बटरच्या समस्येने त्रस्त असलेले लोक बहुतांश वेळा याच कंपनीच्या उत्पादनांवर भरवसा ठेवतात.