Marathi Actor Suicide : मराठी अभिनेता तुषार घाडीगावकरने काम मिळत नसल्याने उचललं टोकाच पाऊल, सिनेसृष्टीत शोककळा

Marathi Actor Tushar Ghadigaokar Dies : मराठी अभिनेता तुषार घाडीगावकरने काम मिळत नसल्याने उचललं टोकाच पाऊल, सिनेसृष्टीत शोककळा पसरली आहे. 

Marathi Actor Tushar Ghadigaokar Dies : मराठी रंगभूमी, चित्रपट आणि मालिका क्षेत्रात अभिनयाच्या माध्यमातून स्वतःची वेगळी ओळख निर्माण करणाऱ्या तुषार घाडीगांवकर याने आत्महत्या केल्याची धक्कादायक घटना उघडकीस आली आहे. काम न मिळाल्याच्या तणावातून त्याने हे टोकाचे पाऊल उचलल्याचे प्राथमिक माहितीमधून समोर आले आहे. या बातमीने मराठी मनोरंजनसृष्टी हादरली असून, त्याच्या निधनाने कुटुंबीय, मित्रपरिवार आणि चाहत्यांना मोठा धक्का बसला आहे.

अभिनय कारकिर्दीतील ठसा 
लवंगी मिरची, मन कस्तुरी रे, भाऊबळी, उनाड, झोंबिवली, सुखाच्या सरींनी हे मन बावरे, आणि संगीत बिबट आख्यान अशा अनेक चित्रपट, मालिका आणि नाटकांमधून तुषारने अभिनय साकारला होता. याशिवाय तो अलीकडेच सन मराठीवरील 'सखा माझा पांडुरंग' या मालिकेत झळकला होता.

सिंधुदुर्ग ते मुंबई: एक अभिनय प्रवास 
मूळचा सिंधुदुर्ग जिल्ह्यातील कणकवली येथील असलेला तुषार, रुपारेल महाविद्यालयाच्या नाट्यविभागात सक्रिय होता. त्याच्या मित्रांमध्ये तो 'घाड्या' या टोपणनावाने प्रसिद्ध होता. कॉलेज नंतर नाट्य, मालिका, आणि चित्रपट अशा विविध माध्यमांतून त्याने अभिनय प्रवास सुरु केला होता.

आत्महत्येने संपले स्वप्न 
अचानक घेतलेल्या या टोकाच्या निर्णयामुळे त्याचा अभिनय प्रवास अर्धवट राहिला आहे. सध्याच्या तणावपूर्ण वातावरणात कामाच्या अपुऱ्या संधी आणि मानसिक दबाव या गोष्टींचा परिणाम म्हणून हा निर्णय झाल्याचा अंदाज वर्तवला जात आहे.

सिनेकलाकारांच्या प्रतिक्रिया

‘चला हवा येऊ द्या’ फेम अभिनेता अंकुर वाढवे याने फेसबुक पोस्टमधून भावनिक श्रद्धांजली वाहताना लिहिलं: “मित्रा का? कशासाठी? कामं येतात जातात! आपण मार्ग काढला पाहिजे, पण आत्महत्या हा मार्ग नाही! तुषार, तू हरलास म्हणजे आम्ही सगळे हरलो...”

वैभव मांगले यांनी लिहिलं: "माणसं आतून खूप तुटलेली असू शकतात… अपेक्षा आणि वास्तव यांचं गणित कधीच जुळत नाही… लोक बोलत नाहीत… ऐकायला कान नाहीत… आत्मीयता नाही… अशी माणसं नंतर एकटी पडत असावीत का?"

मुग्धा गोडबोले, समीर पाटील, अभिषेक देशमुख यांसारख्या अनेक कलाकारांनीही सोशल मीडियावर तुषारच्या निधनावर शोक व्यक्त केला आहे.

दोन आठवड्यांपूर्वी शेअर केलेला हसरा फोटो... आता दु:खाची सावली
 मृत्यूपूर्वी अवघ्या दोन आठवड्यांपूर्वी तुषारने शेअर केलेल्या एका हसऱ्या फोटोवर त्याचे मित्र आणि सहकाऱ्यांनी दु:ख व्यक्त करत भावना व्यक्त केल्या आहेत.

ज्येष्ठ कलादिग्दर्शक नितीन देसाई यांनी केली होती गळफास घेऊन आत्महत्या

कर्जत - भारतीय चित्रपटसृष्टीतील नावाजलेले आणि अनेक राष्ट्रीय पुरस्कारांनी सन्मानित कलादिग्दर्शक नितीन चंद्रकांत देसाई यांनी स्वतःच्या कर्जत येथील एन. डी. स्टुडिओमध्ये गळफास घेऊन आत्महत्या केली होती. या बातमीने संपूर्ण मराठी आणि हिंदी चित्रपटसृष्टी हादरली होती. त्यानंतर कलाक्षेत्रात शोककळा पसरली होती. केवळ ५८ वर्षांच्या वयात त्यांनी जीवनयात्रा संपवली होती.

तीन दशकांची भव्य कलात्मक कारकीर्द

नितीन देसाई हे मूळचे दोंडाईचा (धुळे जिल्हा) येथील. जे. जे. स्कूल ऑफ आर्ट्स मधून त्यांनी कला शिक्षण घेतले होते. त्यांनी १९८७ पासून कला दिग्दर्शनाच्या क्षेत्रात कामाला सुरुवात केली होती. त्यांनी लगान, हम दिल दे चुके सनम, देवदास, जोधा अकबर, खेलें हम जी जान से, बाजीराव मस्तानी, हरिहरन पिठले, बाळगंधर्व यांसारख्या अनेक चित्रपटांना भव्यता आणि ऐतिहासिक सौंदर्य प्रदान केलं होतं.

त्यांच्या कामासाठी त्यांना चार वेळा राष्ट्रीय पुरस्कार प्राप्त झाला होता. त्यांनी भारतातील कलादिग्दर्शनाला एक नवा आयाम दिला आणि भारतीय सिनेमा आंतरराष्ट्रीय पातळीवर पोहोचवण्यात मोठा वाटा उचलला होता.

एन. डी. स्टुडिओ — स्वप्नपूर्तीचा यशस्वी टप्पा

२००५ साली नितीन देसाई यांनी कर्जत (रायगड जिल्हा) येथे तब्बल ५२ एकरांवर पसरलेल्या एन. डी. स्टुडिओची स्थापना केली होती. या स्टुडिओमध्ये बॉलिवूडमधील अनेक चित्रपट, टीव्ही मालिका आणि जाहिरातींचं चित्रीकरण झालं आहे. ‘जोधा अकबर’, ‘बाजीराव मस्तानी’, ‘आशीर्वाद’, ‘स्वराज्य जननी जिजामाता’ अशा ऐतिहासिक मालिका आणि सिनेमांना त्यांनी एन. डी. स्टुडिओमध्ये चित्रीत करताना जिवंतपणाचा स्पर्श दिला होता. त्यांनी शिवस्मारकासाठीही महत्त्वपूर्ण काम केलं होतं. एन. डी. स्टुडिओ हे आज चित्रसृष्टीतील अनेक निर्माते-दिग्दर्शकांसाठी एक आदर्श ठिकाण मानलं जातं.

मराठी अभिनेता आशुतोष भाकर यांनीही केली होती आत्महत्या

मुंबई / नांदेड - मराठवाड्यातील नांदेड शहरात मराठी अभिनेता आशुतोष भाकर यांनी आत्महत्या केली होती. वयाच्या अवघ्या ३२व्या वर्षी त्यांनी आयुष्य संपविल्याची धक्कादायक घटना घडली होती.

नांदेडच्या गणेश नगर भागातील घटना

नांदेड शहरातील गणेश नगर भागातील त्यांच्या फ्लॅटमध्ये आशुतोष भाकर यांनी गळफास घेतल्याचे त्यांच्याच पालकांच्या निदर्शनास आले होते. पोलिसांनी प्राथमिक चौकशीत ही आत्महत्या असल्याचे स्पष्ट केले होते.

अभिनेत्री मयुरी देशमुख यांचे पती

आशुतोष हे प्रसिद्ध मराठी अभिनेत्री मयुरी देशमुख यांचे पती होते. मयुरी देशमुख यांना ‘खुलता कळी खुलेना’ या मालिकेतील भूमिकेमुळे मोठी लोकप्रियता मिळाली होती. भाकरे यांनीही मराठी चित्रपटसृष्टीत आपले स्वतंत्र स्थान निर्माण करण्याचा प्रयत्न केला होता.

चित्रपटसृष्टीतील कामगिरी

आशुतोष भाकर यांनी ‘भाकर’ आणि ‘इचार ठरला पक्का’ या मराठी चित्रपटांमध्ये अभिनय केला होता. त्यांचा अभिनय आणि व्यक्तिमत्व हे नवोदित कलाकारांमध्ये नेहमीच चर्चेचा विषय राहिला होता.

नैराश्याचा सामना आणि शेवटचा व्हिडिओ

पोलिसांनी दिलेल्या माहितीनुसार, आशुतोष हे गेल्या काही दिवसांपासून नैराश्याने ग्रस्त होते. त्यांनी काही दिवसांपूर्वीच "माणूस आत्महत्या का करतो?" या विषयावर एक व्हिडिओ सोशल मीडियावर शेअर केला होता. त्यातून त्यांच्या मनस्थितीचा काहीसा अंदाज लावता येतो, असे सांगण्यात येत होते.