Airtel 1+1 Recharge Offer : एका रिचार्जवर 2 महिने व्हॅलिडिटी.. एअरटेलच्या नव्या ऑफरची संपूर्ण माहिती

Airtel 1+1 Recharge Offer: एका महिन्याचा रिचार्ज केल्यावर पुढचा महिना फ्री मिळाला तर कसं वाटेल? ही ऑफर कशी मिळवायची, ते आपण जाणून घेऊया.

एअरटेलची नवी 1+1 रिचार्ज ऑफर

टेलिकॉम कंपन्या अधूनमधून आपल्या प्लॅन्समध्ये बदल करत असतात. यामुळे ग्राहकांना रिचार्जसाठी जास्त पैसे मोजावे लागतात. पण आता एअरटेल काही निवडक प्रीपेड ग्राहकांसाठी एक नवी ऑफर घेऊन आली आहे. याला '1+1 Recharge Free' असं नाव दिलंय. म्हणजे, पात्र ग्राहकांनी एका विशिष्ट प्लॅनवर एकदा रिचार्ज केल्यास, त्यांना तसाच दुसरा रिचार्ज मोफत मिळतो. समजा तुमचा प्लॅन 28 दिवसांचा असेल, तर या ऑफरमुळे तुम्हाला एकूण 56 दिवसांची व्हॅलिडिटी मिळेल. यामुळे तुमचा महिन्याचा खर्च वाचू शकतो. पण लक्षात ठेवा, ही ऑफर सर्व ग्राहकांसाठी नाहीये, हे कंपनीने आधीच स्पष्ट केलंय.

349 रुपयांच्या प्लॅनमध्ये काय मिळतं?

एअरटेलच्या 349 रुपयांच्या प्रीपेड प्लॅनची व्हॅलिडिटी 28 दिवस असते. यात दररोज 2GB डेटा, अनलिमिटेड कॉल्स आणि रोज 100 SMS मिळतात. शिवाय, पात्र युजर्सना अनलिमिटेड 5G डेटाही वापरता येतो. जर तुमच्या नंबरवर या प्लॅनमध्ये 1+1 ऑफर दिसत असेल, तर तुम्हाला पुढचे 28 दिवस हाच प्लॅन मोफत मिळेल. म्हणजे 349 रुपयांत 56 दिवसांची मजा. यासोबतच 12 महिन्यांसाठी Adobe Express Premium, HelloTunes आणि Airtel Safe सारखे फायदेही आहेत. पण हेच फायदे दुसऱ्या मोफत महिन्यासाठी मिळतील की नाही, हे अद्याप स्पष्ट झालेलं नाही.

399 रुपयांच्या प्लॅनवरही फ्री रिचार्जची संधी

असं सांगितलं जातंय की, एअरटेल 399 रुपयांच्या प्लॅनवरही ही 1+1 ऑफर देत आहे. या प्लॅनची मूळ व्हॅलिडिटी 28 दिवस असते. यात अनलिमिटेड कॉल्स, रोज 100 SMS आणि डेली लिमिटशिवाय अनलिमिटेड 4G/5G डेटा मिळतो. जर तुम्ही या ऑफरसाठी पात्र असाल आणि रिचार्ज केला, तर तुम्हाला पुढच्या 28 दिवसांसाठी हाच प्लॅन फ्री मिळेल. म्हणजे टोटल 56 दिवसांची व्हॅलिडिटी. या प्लॅनमध्येही 12 महिन्यांसाठी Adobe Express Premium सारखे फायदे आहेत. 349 च्या तुलनेत, जे लोक जास्त इंटरनेट वापरतात त्यांच्यासाठी 399 चा प्लॅन भारी आहे. पण रिचार्ज करण्यापूर्वी तुमच्या नंबरवर कोणते फायदे दिसतायत, ते नक्की चेक करा.

कोणाला मिळेल आणि कसं चेक करायचं?

ही ऑफर फक्त निवडक एअरटेल ग्राहकांसाठीच आहे. तुम्हाला ती मिळतेय का, हे पाहण्यासाठी आधी मोबाइलमध्ये Airtel Thanks ॲप उघडा. तुमच्या नंबरने लॉग इन करा. त्यानंतर प्रीपेड रिचार्ज सेक्शनमध्ये जाऊन 349 किंवा 399 रुपयांचा प्लॅन सिलेक्ट करा. त्या प्लॅनच्या बाजूला '1+1 Recharge Free' असं लिहिलंय का ते पाहा. जर तसं दिसलं, तरच तुमच्या नंबरवर ही ऑफर आहे असं समजा. जर दिसलं नाही, तर सध्या तुम्हाला ही ऑफर मिळालेली नाही. मित्राला मिळाली म्हणून तुम्हालाही मिळेल, असा विचार करू नका. आणि हो, ही ऑफर मिळवण्यासाठी Airtel Thanks ॲपमधूनच रिचार्ज करणं आवश्यक आहे.