Weather Update : राज्यात थंडीची लाट, मुंबईत वाढते प्रदूषण; काही भागांत अवकाळी पावसाचा इशारा

Weather Update : राज्य आणि देशभरात हवामानातील बदलांचा परिणाम जाणवत असून मुंबईत प्रदूषण वाढले आहे. महाराष्ट्रात थंडीची लाट कायम असून धुळ्यात 9.3 अंश सेल्सिअस नीचांकी तापमान नोंदवले गेले. 

Weather Update : हवामानातील सततच्या बदलांमुळे राज्यासह देशभरात आरोग्याच्या समस्या वाढताना दिसत आहेत. मुंबईत प्रदूषणाची पातळी चिंताजनक बनली असून श्वास घेणेही धोकादायक ठरत आहे. दुसरीकडे भारतीय हवामान विभागाने पुढील काही दिवस राज्यात थंडी कायम राहण्याचा अंदाज व्यक्त केला असून काही भागांत ढगाळ वातावरण आणि अवकाळी पावसाची शक्यताही वर्तवण्यात आली आहे.

मुंबईत प्रदूषणाचा विळखा, सायंकाळी स्थिती अधिक गंभीर

मुंबईत सध्या वायू प्रदूषणात मोठी वाढ झाली आहे. विशेषतः सायंकाळच्या वेळेस प्रदूषणाची पातळी अधिक वाढत असल्याचे निदर्शनास येत आहे. महापालिकेकडून प्रदूषण नियंत्रणासाठी विविध उपाययोजना केल्या जात असल्याचा दावा केला जात असला, तरी प्रत्यक्षात प्रदूषण कमी होण्याऐवजी वाढतच चालल्याचे चित्र आहे.

राज्यात थंडीची लाट, धुळ्यात नीचांकी तापमान

भारतीय हवामान विभागाच्या अंदाजानुसार, राज्यात पुढील काही दिवस थंडी कायम राहणार आहे. उत्तरेकडील भागात थंडीचा अलर्ट देण्यात आला असून त्याचा परिणाम महाराष्ट्रातही जाणवत आहे. धुळे येथे राज्यातील नीचांकी तापमानाची नोंद झाली असून येथे किमान तापमान 9.3 अंश सेल्सिअस इतके नोंदवले गेले आहे. भंडारा येथेही तापमान 10 अंश सेल्सिअसपर्यंत घसरले आहे.

ढगाळ वातावरणामुळे तापमानात चढउतार

राज्यात काही भागांत ढगाळ वातावरण राहण्याची शक्यता हवामान विभागाने वर्तवली आहे. ढगाळ वातावरणामुळे गारठा कायम राहणार असून किमान तापमानात आणखी घट होण्याची शक्यता आहे. तसेच तापमानात चढउतार जाणवू शकतात. काही ठिकाणी हलका ते मध्यम स्वरूपाचा अवकाळी पाऊस पडण्याची शक्यताही नाकारता येत नाही.

उत्तर भारतात थंडी-धुक्याचे दुहेरी संकट

उत्तर प्रदेशमध्ये दाट धुके आणि कडाक्याच्या थंडीमुळे जनजीवन विस्कळीत झाले आहे. उत्तर प्रदेश, बिहार, हिमाचल प्रदेश, हरियाणा, पंजाब आणि राजस्थान या राज्यांमध्ये थंडी तीव्र झाली आहे. अनेक भागांत दिवसभर थंडी कायम राहण्याचा अंदाज आहे. एकीकडे थंडी तर दुसरीकडे पावसाची शक्यता अशी स्थिती निर्माण झाली आहे.

दक्षिणेत पावसाचा इशारा, हवामानात विस्कळीतपणा

उत्तरेकडे तीव्र थंडी असताना केरळ आणि तामिळनाडूमध्ये पावसाचा इशारा देण्यात आला आहे. देशभरात हवामानात मोठा बदल होत असून विविध भागांत वेगवेगळ्या स्वरूपाचे हवामान अनुभवायला मिळत आहे.

थंडी उशिरा दाखल, अवकाळी पावसाने गोंधळ

राज्यात डिसेंबर महिनाभर थंडी जाणवत होती, मात्र वर्षाच्या पहिल्याच दिवशी अचानक अवकाळी पावसाने हजेरी लावली. या पावसामुळे नागरिकांची चांगलीच तारांबळ उडाली. संपूर्ण जानेवारी महिन्यातही थंडी कायम राहण्याची शक्यता असून यंदा देशात थंडी उशिरा दाखल झाल्याचे चित्र आहे. नोव्हेंबर महिन्याच्या दुसऱ्या आठवड्यापासून गारठा वाढू लागला असून सध्या हवामानात सातत्याने बदल होत आहेत.