Holi Special Trains: होळीसाठी रेल्वेची 'स्पेशल' भेट! मुंबई आणि पुण्यातून सुटणार विशेष गाड्या; पाहा संपूर्ण वेळापत्रक

होळीच्या सणासाठी प्रवाशांची गर्दी कमी करण्याकरिता मध्य रेल्वेने एक विशेष भेट दिली. मुंबई (LTT) ते हटिया, पुणे ते दानापूर दरम्यान विशेष गाड्या चालवण्याचा निर्णय घेण्यात आला आहे. या गाड्या मार्च महिन्यात धावतील, ज्यामुळे प्रवाशांना मोठा दिलासा मिळणार.

होळीसाठी रेल्वेची 'स्पेशल' भेट! मुंबई आणि पुण्यातून सुटणार विशेष गाड्या

मुंबई: होळीच्या सुट्टीत गावी जाण्याचे नियोजन करणाऱ्या प्रवाशांसाठी एक आनंदाची बातमी आहे. रेल्वे स्थानकांवरील गर्दी टाळण्यासाठी आणि प्रवाशांचा प्रवास विनासायास व्हावा यासाठी मध्य रेल्वेने मुंबई (LTT) ते हटिया आणि पुणे ते दानापूर दरम्यान विशेष गाड्या चालवण्याचा निर्णय घेतला आहे. या गाड्यांच्या फेऱ्यांमुळे प्रवाशांना मोठा दिलासा मिळणार आहे. या विशेष गाड्यांचे सविस्तर वेळापत्रक खालीलप्रमाणे आहे. 

१. लोकमान्य टिळक टर्मिनस (मुंबई) ते हटिया विशेष रेल्वे

गाडी क्रमांक ०८६१०: ही गाडी ०४ मार्च आणि ११ मार्च रोजी मुंबईतून (LTT) पहाटे ०५.०० वाजता सुटेल आणि दुसऱ्या दिवशी सकाळी ०९.०० वाजता हटियाला पोहोचेल.

गाडी क्रमांक ०८६०९ (परतीचा प्रवास): ही गाडी ०२ मार्च आणि ०९ मार्च रोजी हटिया येथून पहाटे ०४.२० वाजता सुटेल आणि तिसऱ्या दिवशी दुपारी १२.४० वाजता मुंबईला पोहोचेल.

प्रमुख थांबे: ठाणे, कल्याण, इगतपुरी, नाशिक रोड, मनमाड, भुसावळ, अकोला, नागपूर, गोंदिया, रायपूर आणि बिलासपूर. 

२. पुणे ते दानापूर विशेष रेल्वे (एकूण ६ फेऱ्या)

गाडी क्रमांक ०१४७९: ही गाडी ०१ मार्च, ०५ मार्च आणि ०९ मार्च रोजी पुण्याहून रात्री ०८.५५ वाजता सुटेल आणि तिसऱ्या दिवशी सकाळी ०८.०० वाजता दानापूरला पोहोचेल.

गाडी क्रमांक ०१४८० (परतीचा प्रवास): ही गाडी ०३ मार्च, ०७ मार्च आणि ११ मार्च रोजी दानापूर येथून सकाळी १०.०० वाजता सुटेल आणि दुसऱ्या दिवशी रात्री ०९.१५ वाजता पुण्यात येईल.

प्रमुख थांबे: अहिल्यानगर (अहमदनगर), कोपरगाव, मनमाड, जळगाव, भुसावळ, इटारसी, जबलपूर (मदन महल), प्रयागराज छिवकी आणि बक्सर. 

महत्त्वाची टीप, आरक्षणाबाबत अपडेट

गाडी क्रमांक ०८६१० साठीचे बुकिंग ०२ मार्चपासून सर्व अधिकृत आरक्षण केंद्रांवर आणि रेल्वेच्या संकेतस्थळावर (IRCTC) सुरू होईल. प्रवाशांनी लवकरात लवकर आपले तिकीट आरक्षित करावे, असे आवाहन रेल्वे प्रशासनाकडून करण्यात आले आहे.