मुंबई-गोवा रेल्वे प्रवाशांना मोठा झटका! भर उन्हाळ्यात 'या' ८ एक्स्प्रेस गाड्या रद्द; पर्यटनाचा प्लॅन करण्यापूर्वी ही बातमी नक्की वाचा

Goa Train Cancellation Summer: दक्षिण-पश्चिम रेल्वेच्या घाट विभागात तांत्रिक कामामुळे २८ एप्रिल ते ७ जून या कालावधीत गोवा मार्गावरील ८ एक्स्प्रेस गाड्या अंशतः रद्द करण्यात आल्या आहेत. या गाड्या आता वास्को-दा-गामा ऐवजी हुबळी स्थानकावर थांबतील. 

मुंबई-गोवा रेल्वे प्रवाशांना मोठा झटका! भर उन्हाळ्यात 'या' ८ एक्स्प्रेस गाड्या रद्द

मुंबई : मे महिन्याच्या सुट्टीत गोव्याच्या समुद्रकिनाऱ्यावर जाण्याचे स्वप्न पाहणाऱ्या पर्यटकांच्या पदरी निराशा पडण्याची शक्यता आहे. रेल्वे प्रशासनाने गोवा मार्गावरील ८ महत्त्वाच्या एक्स्प्रेस गाड्या अंशतः रद्द करण्याचा निर्णय घेतला असून, काही गाड्यांचे मार्गही बदलले आहेत. दक्षिण-पश्चिम रेल्वेच्या घाटात चालणाऱ्या तांत्रिक कामामुळे हा मोठा निर्णय घेण्यात आला आहे. 

का घेतला रेल्वेने हा निर्णय?

दक्षिण-पश्चिम रेल्वेच्या कॅसलरॉक ते कुलेम दरम्यानच्या घाट विभागात रेल्वे ट्रॅकच्या नूतनीकरणाचे काम हाती घेण्यात आले आहे. २८ एप्रिल ते ७ जून या कालावधीत दररोज सकाळी ११ ते दुपारी ४ या वेळेत ५ तासांचा मोठा 'ब्लॉक' घेतला जाणार आहे. प्रवाशांच्या सुरक्षिततेसाठी हे काम अत्यंत महत्त्वाचे असल्याचे रेल्वेने स्पष्ट केले आहे. 

या गाड्यांच्या प्रवासावर झाला परिणाम

खालील गाड्या आता गोव्यातील वास्को-दा-गामा पर्यंत न जाता हुबळी (Hubballi) स्थानकावरच थांबतील आणि तेथूनच परतीच्या प्रवासाला निघतील.

शालिमार – वास्को दा गामा (18047/48)

तिरुपती/हैदराबाद – वास्को (17419/20, 17021/22)

सिकंदराबाद – वास्को (17039/40)

जैसिदीह – वास्को (17321/22)

महत्त्वाची सूचना: या बदलांमुळे गोवा, कर्नाटक आणि दक्षिण भारतात प्रवास करणाऱ्या हजारो प्रवाशांना आता हुबळी ते गोवा या प्रवासासाठी पर्यायी व्यवस्था करावी लागणार आहे. 

गाडीचा मार्ग बदलला!

वास्को दा गामा – वेलंकन्नी (17315/16) ही साप्ताहिक गाडी आता नेहमीच्या मार्गाऐवजी मडगाव – मंगळुरू – शोरनूर – एरोड या मार्गे धावेल. यामुळे हुबळी, धारवाड, दावणगेरे आणि बेंगळुरू यांसारखे महत्त्वाचे थांबे या फेरीसाठी रद्द करण्यात आले आहेत. 

प्रवाशांसाठी महत्त्वाचा सल्ला

ऐन पर्यटन हंगामात हा निर्णय आल्याने प्रवाशांमध्ये काहीशी नाराजी आहे. तरीही, तुमचा प्रवास सुखकर व्हावा यासाठी

रेल्वेच्या अधिकृत संकेतस्थळावर (IRCTC) गाडीचे स्टेटस तपासा.

रेल्वे हेल्पलाइन किंवा अधिकृत ॲपवरून अद्ययावत माहिती घ्या.

शक्य असल्यास पर्यायी बस किंवा खासगी वाहनांचे नियोजन आधीच करून ठेवा.